काठमाडौं । रुसले ईयु (युरोपेली युनियन)सँगको सम्बन्ध समाप्त गर्न तयार रहेको बताएको छ ।रुसी राष्ट्रपति भ्लादिमिर पुटिनको सरकारले भ्रष्टाचार विरोधी अभियन्ता एलेक्सी नाभाल्नीलाई जेल सजाय तोकेपछि पश्चिम र रुसबिचको सम्बन्ध बिग्रिंदै गएको छ भने, रुसमाथि थप प्रतिबन्धको कुरा अघि बढेको छ ।
तीन युरोपेली कूटनीतिज्ञहरूले रोयटर्सलाई बताएअनुसार भ्लादिमिर पुटिनका तीन सहयोगीमाथि भ्रमण प्रतिबन्ध र सम्पत्ति फ्रिजको तयारी भएको छ ।केही दिनअघि रुसले जर्मन, पोलिस र स्विडिस कुटनीतिज्ञलाई एलेक्सी नाभाल्नीको पक्षमा प्रदर्शन गरेको भन्दै निष्कासन गरेको थियो ।
यो घटनापछि दुवै पक्षबिचको सम्बन्ध झनै बिग्रिएको छ । रुसी विदेश मन्त्रालयको वेबसाइटमा राखिएको एक अन्तर्वाताको क्लिपमा विदेशमन्त्री सर्जे लाभ्रोभलाई ईयुसँगको सम्बन्ध समाप्त गर्ने विषयमा प्रश्न सोधिएको छ ।
त्यसको जवाफमा रोयटर्सले अनुवादित गरे अनुसार, "हामी तयार छौं भन्ने तथ्यबाट हामी अघि बढ्छौं, हाम्रो अर्थव्यवस्थामा जोखिम पैदा गर्ने क्षेत्रमा प्रतिबन्ध लगाइएको घटनामा हेरफेर गर्छाैं विदेश मन्त्री लाभ्रोभले", भनेका छन् ।
"हामी विश्वव्यापी जीवनबाट आफूलाई अलग गर्न चाहदैनौं, तर, हामी यसका लागि तयार हुनुपर्छ, शान्ति चाहिन्छ भने युद्धका लागि तयार हुनुपर्छ", उनले भनेका छन् ।
