-
-
-
-
काठमाडौं । प्रतिनिधि सभा विघटनसम्बन्धी सुनुवाइमा आइतबारबाट संवैधानिक इजलासमा जवाफी बहस शुरु भएको छ । प्रारम्भमा अधिवक्ता दिनमणि पोखरेल बहसमा सहभागी भएका छन् ।
प्रधानमन्त्री केपी शर्मा ओली पक्षका वकिलहरुले गत बिहीबार प्रतिरक्षा बहस सकेपछि रिट निवेदक पक्षका वकिलहरुले जवाफी बहस सुरु गरेका हुन् ।
नेकपाका प्रमुख सचेतक देव गुरुङका तर्फबाट वरिष्ठ अधिवक्ताहरु रमण श्रेष्ठ, शम्भु थापालगायतले पनि जवाफी बहस गर्ने भएका छन् ।
प्रधानमन्त्री ओलीको सिफारिसमा राष्ट्रपति विद्यादेवी भण्डारीले गत पुस ५ गते प्रतिनिधिसभा विघटन गरेपछि सर्वोच्च अदालतमा १३ वटा रिट निवेदन दायर भएका थिए ।
जवाफी बहस सकिएपछि अदालतको आदेशअनुसार नेपाल बार र सर्वोच्च अदालत बार एसोसिएसनबाट सिफारिस भएका एमिकस क्यूरीले इजलासलाई राय दिनेछ ।
