नेपाल समूहमाथि सूर्य थापाको आक्रोश, ‘अपराधीहरुको मुहार झलझली सम्झना भइरहेको छ’

जिज्ञासामा दिए रुखो जवाफ, मन्त्री परिषद बैठक बस्ने जानकारी छैन

बाबु नेपाली,

प्रकाशित २०७७ फागुन २५ मंगलबार

काठमाडौं । प्रधानमन्त्री केपी शर्मा ओलीका प्रेस सल्लाहकार तथा नेकपा एमालेका केन्द्रीय सदस्य सूर्य थापाले सर्वोच्च अदालतले एमाले र माओवादी ब्युँताउनुअघि प्रधानमन्त्री केपी शर्मा ओलीमाथि गरिएका क्रियाकलापप्रति आक्रोश पोखेका छन् ।

उनको यो आक्रोशले एमालेभित्र पुरानै अवस्थामा नेताहरु आफ्ना गतिविधिमा लाग्ने अवस्था नदेखिएको स्पष्ट हुन्छ । सामाजिक संजालमा मंगलबार बिहान थापाले ओलीलाई चार पटक पार्टी सदस्यताबाट निष्काशित गरेको घोषणा गर्ने अपराधीहरुको मुहार झलझली सम्झना भइरहेको भन्दै माधव नेपाल पक्षमाथि आक्रोश पोखेका छन् ।

नेकपा रहँदा गत पुस ५ गते प्रधानमन्त्री ओलीले संसद विघटन गरेपछि प्रचण्ड–नेपाल समूहले छुट्टै गतिविधि संचालन गर्दै संसद विघटनको विरोध गर्र्दै सडकमा ओर्लेका थिए भने ओलीलाई पार्टी सदस्यताबाट समेत हटाएका थिए ।

अहिले थापाले त्यही आक्रोश पोखेका हुन् । उनले लेखेका छन्, ‘प्रधानमन्त्री तथा पार्टी अध्यक्ष केपी शर्मा ओलीलाई चार पटक पार्टी सदस्यताबाट निस्कासित गरेको घोषणा गर्ने अपराधीहरुको मुहार झलझली सम्झना भइरहेको छ । दुई तिहाइको जनादेश पाएकोमा सरकारलाई घेराबन्दी गरी असफल बनाउन न्वारानदेखिको बल लगाउने यिनको अनैतिक हर्कत बिर्सन मिल्दैन ।’

यसबारेमा आक्रोश माधव नेपाल पक्षतिर हो कि कता हो ? भनी हाम्राकुराको जिज्ञासामा उनले भने, ‘तपाई नेपाली शब्द पढ्न जान्नुहुन्न ?’ जान्दछु कि तैपनि सोधेको भनेर भन्दा उनले भने, ‘जानेरै गर्नुभा होला त पत्रकारिता । आफै अर्थ लगाउनु न त्यति त जानेरै गर्नु भा होला पत्रकारिता ।’

उनले पार्टीभित्रको आन्तरिक किचलोमा पटक पटक संचारकर्मीसँगको रुखोपनलाई निरन्तरता दिँदै आएका छन् । धेरै संचारकर्मीले उनको रुखो प्रतिक्रियाको सामना गर्दै आइरहेका छन् ।

थापा पनि लामो समयदेखि पत्रकारिता गरेरै त्यो गरिमामय पदमा पुगेका हुन् । । उनले पार्टीका नेताहरुलाई पनि यसरी नै गाली गर्दै आइरहेका छन् ।

उनले मन्त्रीपरिषद बैठक बस्ने बारेमा भने अहिलेसम्म जानकारी नभएको बताए ।