खनाल-नेपाल पक्षद्वारा दुई महिने अभियानको घोषणा, ओलीलाई एकतामा फर्कन आह्वान
प्रकाशित २०७७ चैत २१ शनिबार
645
Shares
काठमाडौं । पार्टी एकता गम्भीर संकटमा रहेको भन्दै नेकपा (एमाले)को झलनाथ खनाल र माधवकुमार नेपाल समूहले देशभर दुई महिने संगठन निर्माण अभियान सञ्चालन गर्ने भएको छ ।
शनिबार बसेको खनाल–नेपाल समूहको स्थायी कमिटी सदस्यहरूको बैठकले देशभर संगठन निर्माण, सुदृढीकरण अभियानका साथै प्रशिक्षणका दुई महिने कार्यक्रम गर्ने निर्णय गरेको हो ।
उक्त समूहले अध्यक्ष केपी शर्मा ओलीलाई २०७५ जेठ २ गतेलाई आधारमा मानेर एकतामा फर्कन आह्वान समेत गरेको छ । आगामी दुई महिनाका लागि घोषणा भएको कार्यक्रमका लागि जिल्लाहरूमा केन्द्रीय प्रतिनिधि खटाउने निर्णय समेत भएको छ
बैठकले ‘नेकपा एमालेको एकतालाई जोगाऔं, कम्युनिस्ट आन्दोलनको रक्षा गरौं’ भन्ने नाराका साथ अभियान घोषणा गरेको हो ।
बैठकपछि नेता योगेश भट्टराईले संचारकर्मीहरुसँग कुरा गर्दै एमालेको एकता संकटमा रहेकाले दुई पार्टीलाई पूर्ववत अवस्थामा फर्काउने २३ फागुनको सर्वोच्च अदालतको फैसलाअनुसार २ जेठलाई आधार मानेर पार्टी एकतामा फर्कन अध्यक्षलाई आग्रह गरेको जानकारी दिए ।
