काठमाडौं । नेपाली कांग्रेसको केन्द्रीय कार्यसमिति बैठक आइतबार बस्दैछ । बैठक दिउँसो २ बजे पार्टी केन्द्रीय कार्यालय सानेपामा बस्दैछ । बैठकमा पार्टीको १४ औं महाधिवेशनदेखि अहिलेको समसामयिक विषयमा छलफल हुने कांग्रेस केन्द्रीस्य कार्यालयका मुख्यसचिव कृष्णप्रसाद पौडेलले बताएका छन् । 

यसअघि बस्नुपर्ने बैठक कांग्रेस वरिष्ठ नेता रामचन्द्र पौडेलका भाइको निधनका कारण आइतबारलाई सरेको हो । आगामी भदौमा कुनै पनि हालतमा महाधिवेशन गर्नुपर्ने भए पनि नेतृत्व गम्भीर बन्न नसकेको आरोप लाग्दै आएको छ । 

महाधिवेशनका लागि क्रियाशील सदस्यता वितरण तथा नवीकरणका लागि पटक पटक म्याद थपिए पनि पूर्ण हुन सकेको छैन । 
कांग्रेसले चैत ३० गतेसम्म क्रियाशील सदस्यताका काम सक्न जिल्ला कार्यसमितिहरुलाई निर्देशन दिएको थियो ।

तर केही जिल्लाले अझैसम्म क्रियाशील सदस्यता वितरण गर्न फारम नपाएको बताएका छन् । कांग्रेसले महाधिवेशनका लागि क्रियाशील सदस्यको संख्या १० लाख पुर्याउने योजना बनाएको भए पनि अहिलेसम्म ६ लाख मात्रै सदस्य पुगेको बताइएको छ । 

सत्ता परिवर्तनको खेलबारे छलफल
कांग्रेसले लामो समयसम्म विशेष मुद्दा बनाउन नसकेको सत्ता परिवर्तनको मुद्दालाई पनि आइतबारको बैठकमा गम्भीर रुपले उठाउने भएको छ । 

कर्णाली प्रदेशमा कांग्रेसले सघाएर मुख्यमन्त्री महेन्द्रबहादुर शाही विरुद्धको अविश्वासको प्रस्ताव असफल भएको छ । शुक्रबार भएको उक्त कदमपछि कांग्रेस उक्त सरकारमा सहभागी हुने सम्भावना बढेको छ । 

त्यस्तै प्रधानमन्त्री केपी शर्मा ओलीले चालेको असंवैधानिक कदमपछि प्रदेशमा देखिएको असन्तुष्टिलाई कांग्रेसले सत्ता परिवर्तनको अवसरका रुपमा अब मुद्दा बनाउनु पर्ने आवाज नेताहरुले उठाउन थालेका छन् । 

यो विषयमा गम्भीर छलफल गरी एक वा दुई प्रदेशमा कांग्रेसले सरकारको नेतृत्व गर्ने गरी अगाडि बढ्नु पर्ने नेताहरुको जोड छ । 

ओलीले आफ्नै पार्टी एमालेका इतर पक्ष (खनाल–नेपाल) का नेताहरुलाई धमाधम कारबाही गर्ने नीति अख्तियार गरेपछि प्रदेशहरुमा सत्ता परिवर्तन हुने निश्चित जस्तै छ । 

यो प्रक्रिया प्रदेश हुँदै संघीय सरकारमा पनि आउन सक्ने भन्दै अब यसका लागि पनि नेतृत्व तयार हुनुपर्ने दबाब बढेको छ ।