अनुशासनहीन र अराजक पक्षलाई सम्झाउने-बुझाउने काम भइरहेको छ: अध्यक्ष ओली

हाम्रा कुरा

प्रकाशित २०७८ वैशाख ९ बिहिबार

काठमाडौं । नेकपा (एमाले) का अध्यक्ष एवं प्रधानमन्त्री केपी शर्मा ओलीले पार्टीमा रहेका अनुशासनहीन र अराजक पक्षलाई सम्झाउने-बुझाउने र सच्याएर मूलधारमा कायम राख्ने कोशिस भइरहेको जानकारी गराएका छन् ।

बल्खुमा निर्माण हुने एमालेको केन्द्रीय कार्यालय भवनको विहीबार शिलान्यास गर्दै ओलीले कम्युनिष्ट आन्दोलनलाई अलोकप्रिय बनाउने र पार्टीलाई अनुचितरुपमा कब्जा गर्ने प्रयासलाई विफल तुल्याएर जनताका समृद्धिका अपेक्षा पूरा गर्नुपर्ने पनि औंल्याएका छन् ।

उनले अघि भने, ‘कम्युनिष्ट आन्दोलनलाई सफलतातर्फ उन्मुख गराउँदै अघि बढ्नका लागि पार्टीमा रहेका अनुशासनहीन र अराजक पक्षलाई सम्झाउने-बुझाउने र सच्याएर मूलधारमा कायम राख्ने कोशिस भइरहेको छ ।’

‘पार्टीलाई अनुचित हिसाबले कब्जा गर्ने क्रियाकलाप र ‘फ्लोर क्रस’जस्ता अराजक दृष्य यसअघि कहिल्यै देखिएको थिएन । पार्टीमा अब यस्तो चल्दैन । हामी सुदृढ र गतिशील सङ्गठन निर्माणको प्रक्रियामा अघि बढेका छौं’, उनले भने ।

माधव-झलनाथ समूहका नेताहरुलाई लक्षित गर्दै उनले अनुशासित भएर पार्टीमा काम गर्न आह्वान गर्दै भने, ‘अनुशासित भएर पार्टीमा काम गरौं भनेर हरेकलाई सम्झाइरहेका छौं ।’