-
-
-
-
काठमाडौं । नयाँ सरकार गठनका लागि अहिले नेपाली कांग्रेसका सभापति शेरबहादुर देउवाको निवास बुढानीलकण्ठमा छलफल हुँदैछ । उक्त सामूहिक छलफलमा कांग्रेस, माओवादी केन्द्रका नेताहरु सहभागी हुँदैछन् ।
त्यसैगरी नेकपा एमालेको खनाल–नेपाल समूह पनि बैठकमा सहभागी हुँदैछ । खनाल–नेपाल समूहले सोमबार प्रधानमन्त्री एवं एमाले अध्यक्ष केपी शर्मा ओलीलाई संसदमा विश्वासको मत दिएन ।
पार्टीको विधान मिचेर आफूहरुलाई कारबाही गरिएको भन्दै उक्त समूह ओलीसँग रुष्ट छ ।
त्यस्तै जनता समाजवादी पार्टी (जसपा) को उपेन्द्र यादव–डा. भट्टराई समूह पनि बैठकमा सहभागी हुँदैछ ।
तीन दलले सोमबारै राष्ट्रपतिलाई संयुक्त सरकारका लागि अपिलसमेत गरिसकेका छन् ।
तर जसपाको महन्थ ठाकुर पक्षले भने नयाँ सरकारमा संलग्न नहुने भन्दै प्रेस विज्ञप्ति जारी गरिसकेको छ ।
यसैबीच, नेपाली कांग्रेस पार्टी कार्यालयका मुख्यसचिव कृष्णप्रसाद पौडेलले कांग्रेसको पदाधिकारी बैठक दिउँसो ३ बजे बस्ने बताएका छन् ।
कांग्रेस सभापति देउवाको नेतृत्वमा नयाँ सरकार गठनको कसरत भइरहँदा थप योजना बनाउनका लागि उक्त बैठक बस्न लागेको हो ।
बैठकमा पूर्व पदाधिकारीहरुसँगै वर्तमान पदाधिकारीहरु पनि सहभागी हुँदैछन् ।
