धनुषामा मोटरसाइकल एकापसमा ठोक्किँदा एक जनाको घटनास्थलमै मृत्यु

निरञ्जन कुमार साह,

प्रकाशित २०७८ असोज १ शुक्रबार

जनकपुरधाम । धनुषामा दुई मोटरसाइकल एकापसमा ठोक्किएर दुर्घटना हुँदा एक जनाको मृत्यु भएको छ, भने अर्का एक जना घाइते भएका छन्।

शुक्रवार पूर्व पश्चिम राजमार्ग अन्तर्गत धनुषाको मिथिला नगरपालिका वडा नम्बर ६ ढल्केवरस्थित पूर्व चौकमा पूर्वबाट पश्चिमतर्फ आउँदै गरेको लु. ७२ प. ४७९२ नम्बरको मोटरसाइकल र विपरीत दिशाबाट जाँदै गरेको स. ४ प. ७९२६ नम्बरको मोटरसाइकल एकापसमा ठोक्किएर दुर्घटना भएको इलाका प्रहरी कार्यालय ढल्केवरले जानकारी दिएको छ ।

दुर्घटनामा परेर स. ४ प. ७९२६ नम्बरको मोटरसाइकल चालक सिराहाको विष्णुपुर गाउँपालिकास्थित नरहाका अन्दाजी ३० वर्षीय रुपेश यादवको घटनास्थलमै मृत्यु भएको प्रहरी स्रोतले जनाए ।

इलाका प्रहरी कार्यालय ढल्केवरका प्रहरी निरीक्षक प्रदीप सुवेदीका अनुसार लु. ७२ प. ४७९२ नम्बरको मोटरसाइकल चालक धनुषाको गणेशमान चारनाथ नगरपालिका वडा नम्बर ६ बस्ने ४६ वर्षीय मोहम्मद हासिम घाइते भएका हुन् ।

घाइतेको उपचार स्थानीय स्वास्थ्य केन्द्रमा भइरहेको र उनको अवस्था सामान्य रहेको बताए । मृतकको शव पोस्टमार्टमका लागि जनकपुरस्थित प्रादेशिक अस्पताल पठाइएको छ ।