नेपाल मेडिकल काउन्सिलमा एमबिबिएसका विद्यार्थीहरूको आन्दोलन
हाम्रा कुरा
प्रकाशित २०७८ असोज ११ सोमबार
716
Shares
काठमाडौं। चीनमा एमबिबिएस पढाइ सकेर नेपालमा रहेका विद्यार्थीहरू इन्टर्नसिपको माग गर्दै काठमाडौंमा आन्दोलनरत छन् । नेपाल मेडिकल काउन्सिल, चिकित्सा शिक्षा आयोग र सम्बन्धित सरकारी निकायले उनीहरूलाई इन्टर्नसिपको व्यवस्था नगरिदिँदा आन्दोलन गर्न पुगेका हुन् ।
आइतबार काठमडौंको माइतीघर मण्डलामा विरोध कार्यक्रम गरेका उनीहरुले सोमबार अर्थात् आज नेपाल मेडिकल काउन्सिलमा विरोध प्रदर्शन गरेका हुन् ।
कोरोना भाइरसको महामारीका कारण उनीहरूले नेपालमै अनलाइन कक्षा लिएर अन्तिम महिनातिरको बाँकी पढाइ सकेका थिए । यसपछि उनीहरूले १ वर्ष इन्टर्नसिप गर्नुपर्ने हुन्छ ।
महामारीकै कारण अझै चीन जान नपाउँदा उनीहरूले नेपालमै इन्टर्नसिपको माग गरेका छन् । चीनले खोप लगाएका अन्य नागरिक एवं व्यावसायिकहरूलाई चीन जान दिए पनि विद्यार्थीहरूलाई भने अझै रोकेको छ ।
चिनियाँ संस्थानहरूको लापरबाहीका कारण सङ्कटमा परेका विद्यार्थीहरूको विषयमा नेपालमा समेत सरोकारवाला निकायले अन्योल सिर्जना गरेका छन् ।
नेपाल मेडिकल काउन्सिल र चिकित्सा शिक्षा आयोगले यसअघि निर्णय गरेर इन्टर्नसिपकै क्रममा रहेकाहरूलाई भने इन्टर्नसिप गर्न दिएको छ । तर, पढाइ सकेर इन्टर्नसिप सुरु गर्नुपरेका विद्यार्थीहरूका लागि भने निर्णय गरेको छैन ।
यसबिच आफूहरूको भविष्य सुनिश्चित गर्न माग गर्दै विद्यार्थीहरू संघर्षरत् छन् ।
