काठमाडौँ । दुर्घटना हुनबाट जोगिएको श्री एयरलाइन्सको जहाज निकाल्ने प्रयास जारी रहेको छ । त्रिभुवन अन्तर्राष्ट्रिय विमानस्थलको आन्तरिक पार्किङ क्षेत्रको घाँसे मैदानमा चिप्लिएको श्री एयरलाइन्सको जहाज निकाल्ने प्रयास जारी रहेको विमानस्थल व्यवस्थापनले जनाएको छ ।
जहाज पार्किङबाट निकाल्ने क्रममा टर्निङको क्रममा जहाजको ब्यालेन्स नमिल्दा तीन मिटर जति जहाज डिस्ब्यालेन्स भएको छ । 'प्याकिङबाट निकाल्ने क्रममा डिसब्यालेनस भएर तीन फिट पर सरेको छ, टर्निङको क्रममा जहाजको देब्रेपट्टिको चक्का चिप्लिएको हो । अहिले जहाज निकाल्ने काम भइरहेको छ', विमान स्थलका एक कर्मचारीले भने ।
विमानस्थलको आन्तरिक उडानतर्फ पार्किङमा जहाज चिप्लिएकाले विमानस्थलबाट हुने सम्पूर्ण उडान सञ्चालनमा कुनै अवरोध नभएको पनि विमानस्थलले जनाएको छ ।
नाइननानएफ कल साइन भएको क्यू४००-८ जहाज काठमाडौँबाट नेपालगन्जका लागि बिहान ९:३३ मा उडान भर्ने क्रममा ‘डोमेष्ट्रिक पार्किङ्’बाट रनवेतर्फ निकाल्ने क्रममा जहाज चिप्लिएको थियो । धावनमार्गमा ट्याक्सी गर्ने क्रममा पार्किङ क्षेत्रमै एउटा चक्का घाँसे मैदानमा फस्न पुगेको विमानस्थलका महाप्रबन्धक प्रतापबाबु तिवारीले जानकारी दिए ।
उनका अनुसार फसेको जहाज निकाल्ने प्रयास भइरहेको छ । उक्त जहाजमा चालक दलका चारसहित ८० जना सवार थिए ।
