बागलुङ । बागलुङको सामाजिक संस्था घुम्टे युवा परिवार गलकोट नगरपालिका ७ मल्मले भलिबल खेलाडीहरुलाई सम्मान गरेको छ । विजया दशमी, शुभ दीपावली तथा छठ पर्वको अवसरमा बिहीबार आयोजित शुभकामना आदान–प्रदान कार्यक्रममा दोसल्ला, सम्मान पत्र र मायाको चिनोद्वारा गलकोट नगर भलिबल टिमलाई सम्मान गरिएको संस्थाका अध्यक्ष थम्मन थापा सन्देशले जानकारी दिए ।
गलकोट क्षेत्रबाट राष्ट्रिय स्तरका खेलमा उत्कृष्ट प्रदर्शन गरेर नगरलाई खेलकुदको विकास र प्रवर्धनमा उल्लेख्य योगदान पुर्याएको र आगामी दिनमा खेलाडीलाई थप प्रोत्साहन गर्न सम्मान गरिएको अध्यक्ष थापाले बताए । गलकोट नगरको भलिबल टिमका प्रशिक्षकहरु सुरेन्द्र केसी, हिमाल चालिसे, खेलाडीहरु दिपक मल्ल, मिनबहादुर विश्वकर्मा, बिमल परियार, राजु विक, रवि केसी, कुश्मन थापा, प्रकाश विक, रिजन राना, सुजन चोखाल, चन्द्र विश्वकर्मालाई सम्मान गरिएको संस्थाका उपाध्यक्ष जीवन साहानीले बताए ।
खेलाडीहरुलाई गलकोट नगरपालिका वडा नं ७ का वडा अध्यक्ष सुवेदार टिकाबहादुर थापा, संस्थाका अध्यक्ष थम्मन थापा सन्देश, संस्थापक सदस्यहरु राजबहादुर थापा, बेलुकाजी थापा र बाबुराम थापाले सम्मान प्रदान गएका थिए ।
सम्मान ग्रहण पछि बोल्दै गलकोट नगर भलिबल टिमका प्रशिक्षक हिमाल चालिसेले यो सम्मानले आगामी दिनमा खेलकुदलाई थप सशक्त बनाउन प्रेरणा मिल्ने बताए । त्यस्तै खेलाडीहरु दिपक मल्ल र मिनबहादुर विश्वकर्माले यी र यस्ता कार्यले आफूहरुलाई थप हौसला भएको बताए ।
कार्यक्रममा उपस्थित महानुभावबीच एक आपसमा विजया दशमी, शुभ दीपावली र छठ पर्वको शुभकामना आदान प्रदान गरिएको थियो ।
कार्यक्रममा संस्थाका आजीवन सदस्यहरु, साधारण सदस्यहरु, पूर्व कार्यसमितिका पदाधिकारीहरु, कार्यसमितीका पदाधिकारीहरु, राजनैतिक दलका प्रमुख, संस्थाका सल्लाहकार सदस्यहरु, संस्थापक सदस्यहरुको उल्लेख्य उपस्थिति रहेको थियो ।
कार्यक्रम संस्थाकी सचिव सावित्री थापाले संचालन गरेकी थिइन् ।
