काठमाडौं । नामिबिया पहिलो पटक आईसीसी टी–२० विश्वकप क्रिकेटको सुपर १२ मा प्रवेश गर्न सफल भएको छ । यूएई र ओमानको संयुक्त आयोजनामा जारी विश्वकपमा नामिबियाले पहिलो पटक सुपर १२ मा स्थान सुरक्षित गरेको हो ।
यूएईको शारजाहमा शुक्रबार भएको खेलमा समूहको अन्तिम खेलमा आयरल्याण्डलाई ८ विकेटले हराउँदै नामिबियाले उक्त सफलता हासिल गरेको हो ।
१२६ रनको सामान्य विजयी लक्ष्य नामिबियाले १८.३ ओभरमा २ विकेटको नोक्सानीमा पूरा गर्यो । नामिबियालाई जित दिलाउन कप्तान गेरहार्ड इरास्मसले नटआउट रहँदै ४९ बलमा ५३ रन बनाए ।
अलराउन्डर एवं प्लेयर अफ द म्याच डेभिड विसेले नटआउट रहँदै १४ बलमा २८ रन बनाए । दुवै विकेट आयरल्याण्डका कर्टिस कापरले लिए ।
आयरल्याण्डको इनिङ्स
यसअघि टस जितेर पहिले ब्याटिङ गरेको आयरल्याण्डले ८ विकेटको नोक्सानीमा १२५ रनमात्र बनायो । तीन खेलाडीले मात्र दोहोरो स्कोर खडा गरेको इनिङ्समा ओपनर पाउल स्टर्लिङले सर्वाधिक ३८ रन बनाए ।
नामिबियाका जान फ्रिलिंकले सर्वाधिक ३ विकेट लिए । डेभिड विसेले २ तथा जेजे स्मिथ र बर्नार्ड शोल्ट्जले १–१ विकेट लिए ।
समीकरण
यो जितसँगै नामिबियाले ४ अंकसहित समूहको उपविजेता भएर सुपर १२ मा स्थान बनाएको हो । शतप्रतिशत नतिजासहित ६ अंकबाट समूह विजेता बन्दै श्रीलंका सुपर १२ मा पुग्यो ।
