बाजुरा । बाजुराको उत्तरी भेगमा पर्ने पाण्डुसैन गाविस ९ की एक सुत्केरी महिलाको मृत्यु भएको छ । सोही गाविस ९ बस्ने मान बहादुर ओलीकी श्रीमती २२ वर्षकी टिका थापा (ओली) को मृत्यु भएको आफन्तले जनाएका छन् । पाण्डुसैनबाट १ दिनको पैदल यात्रामा सुत्केरी गराउनका लागि बोकेर ल्याएकी थापाको मृत्यु भएको उनका आफन्त गणेश थापाले बताएका छन् ।
सुत्केरी व्यथा लागेको दिन जिल्ला स्वास्थ्य कार्यालयमा ल्याइएको थियो । आकस्मिक प्रसुती केन्द्रमा काम गर्दे आएका डाक्टर राजन न्यौपानेले रगत अभाव हुदा थाहा भएको भए पनि कुनै वास्ता नगरी गर्भवती महिलाको अप्रेसन गरी बच्चा निकालीएको आफन्त थापाले आरोप लगाएका छन् ।
मृत्युको मुखमा पुगेकी थापाको अप्रेसन पछि जिल्ला डाक्टर न्यौपानेले पिसाव रोकिएको भन्दै बाजुराबाट नेपालगञ्जमा रहेको कोहलपुर मेडिकलमा रिफर गरेको उनहरुले बताए । रिफर पछि नेपालगंज कोहलपुर मेडिकलमा ९ दिनपछि उनको स्वास्थ्यमा सुधार नआएपछि अस्पतालले काठमाण्डौमा रिफर गरेको थापाले सुनाए ।
सुत्केरी गराउदा कुनै चेकजाँच नगरी मनोमानी ढंगले उनको अप्रेसन गरेको पिडितले गुनासो गरे । उनको स्वास्थ्मा रहेका दुवै मृगौलाले काम गर्न छाडेको र सुत्केरी महिला दिर्घ रोगी भएको भन्दै डक्टर न्यौपानेले अप्रेसन गरेको पिडित मान बहादुर ओलीले बताए । डक्टर न्यौपानेले मुखले एक भनेको र काम गर्दा अर्कै गरेको ओलीले भने । उनले असार १७ गते अप्रेसन गरी बच्चा पाएकी थिइन् । असार १८ गते पिसाव रोकिएको भन्दै रिफर गरिएको ओलीको भनाइ छ ।
पिडित ओलीका अनुसार नेपालगञ्जमा उपचार गराउदा दिर्घ रोगी र शरिरका दुबै मृगौलाले काम गरि रहेको कोहलपुर मेडिकलले जनाएको ओलीले भने । डाक्टर न्यौपानेको लापरबाहीका कारणले मृत्यु भएको भन्दै ओलीले नेपाल काउन्सिलमा मुद्धा दर्ता गरेको बताएका छन् । दोषीलाइ कारबाही र छानविन गरी नेपाल काउन्सिल प्रमाण पत्र खारेजीका लागि दर्ता गराएको बताए ।
जिल्ला स्वास्थ्य कार्यालय बाजुराका कार्यालय प्रमुख डाक्टर मोहन नाथले भने कोहलपुर मेडिकल अस्पतालबाट नै दिर्घ मृगौला रोगी भएको जानकारी आएको बताए । अप्रेसन गर्दा कुनै समस्या नभएको नाथले भने । उनको मृत्यु के कसरी भयो यो बारेमा आफुलाइ कुनै जानकारी नभएको बताए ।
तर आफन्त गणेश थापाले भने निमोनिय भएको कारणले मृत्यु भएको अन्तिम रिपार्टमा लेखिएको बताए । मृतककी २ महिनाकी छोरी अलपत्र भएकी छन् ।
