काठमाडौं । सन् २०२१ को आईसीसी टी–२० क्रिकेट प्रतियोगिता सकिएको छैन । तर अर्को वर्ष हुने विश्वकपका लागि ८ टिम छानिइसकेका छन् ।
अहिले भइरहेको प्रतियोगिताको प्रदर्शनका आधारमा आठ टिम छानिएका हुन् । समूह १ बाट इङ्गल्याण्ड, अष्ट्रेलिया, दक्षिण अफ्रिका र बंगलादेश छानिए ।
समूह २ बाट पाकिस्तान, न्यूजिल्याण्ड, भारत र अफगानिस्तान छानिए । शीर्ष ४–४ टिम छानिने भए पनि समूह १ बाट पुछारको अंकविहीन बंगलादेश छानियो । तर श्रीलंका र वेष्ट इन्डिज भने छानिएनन् ।
आईसीसीको नियमअनुसार शीर्ष आठ टीम छानिनु पर्ने थियो । तर नोभेम्बर १५ सम्म आईसीसीको टी–२० वरियता अनुसार शीर्ष वरियताका ६ टिम र जारी विश्वकपका विजेता र उपविजेता छानिने आईसीसीले जनाएको छ ।
यो नियमसँगै इङ्गल्याण्ड, पाकिस्तान, भारत, न्यूजिल्याण्ड, दक्षिण अफ्रिका र अष्ट्रेलिया शीर्ष ६ मा रहे भने बंगलादेश र अफगानिस्तान पनि शीर्ष आठमा समेटिए ।
तर श्रीलंका र वेष्ट इन्डिज रहेनन् । यी टिमहरुले छनोट खेल्नुपर्नेछ । छनोटमा ८ टिम हुन्छन् र तीमध्ये ४ टिम सुपर १२ मा पुग्छन् र शुरु हुन्छ सुपर १२ को भिडन्त ।
