पोखरा । अर्थमन्त्री जनार्दन शर्माले पोखरा-काठमाडौँ सडक यात्रालाई दुई घण्टामा छोटाउने योजना सुनाएका छन् । पोखरा उद्योग वाणिज्य सङ्घले कास्कीको पोखरामा आयोजना गरेको स्वागत तथा छलफल कार्यक्रमलाई सम्बोधन गर्दै मन्त्री शर्माले यसको लागि भौतिक पूर्वाधार मन्त्रालयसँग छलफल भइरहेको जानकारी दिएका हुन् ।

‘पोखरा काठमाडौँलाई २ घण्टामा कसरी जोड्न सकिन्छ ? यस विषयमा छलफल सुरु भएको छ । सुरुङ मार्ग बनाएर हुन्छ या वैकल्पिक मार्ग बनाएर हुन्छ, छलफल चलिरहेको छ ।’ उनले भने ‘ पोखरा-काठमाडौँ सडक मार्गलाई अन्तर्राष्ट्रिय स्तरको बनाएर यात्रा छोटाउने सरकारको योजना छ ।’

कार्यक्रममा उद्योगी व्यवसायीहरूले कोभिड-१९ बाट थलिएको उद्योग व्यवसाय क्षेत्रलाई राहत मिल्ने गरी सरकारले थप कार्यक्रम ल्याउनुपर्ने, बैंकिङ्ग क्षेत्रको अराजकता नियन्त्रण गरी ऋणको ब्याजदर घटाउनुपर्ने, पोखरा विमानस्थल निर्माण कार्य छिटो सम्पन्न गर्नुपर्ने, कर्जा वितरणलाई सहज बनाउनुपर्ने लगायतका मागहरू राखेका थिए । 

मन्त्री शर्माको मन्तव्यको सम्पादित अंश :
सरकारले सडकको नक्शांकन गर्ने कार्यक्रम ल्याएको छ । अन्तर्राष्ट्रिय स्तरका सडकहरू बनाउनको लागि नक्शांकन गर्ने योजना बनाइएको हो । लगाइएको छ । सङ्घीय सरकारले गन्नुपर्ने, प्रदेश सरकारले गर्नुपर्ने र स्थानीय तहले बनाउनुपर्ने सडकहरूको नक्शांकन गर्न लागिएको छ । पोखरा क्षेत्रीय अन्तर्राष्ट्रिय विमानस्थल सञ्चालन गर्ने गरी काम अघि बढाइन्छ । सार्वजनिक खरिद ऐन संशोधनको तयारी भइरहेको छ 

कार्यमैत्री वातावरण निर्माण गर्ने गरी ऐन संशोधनको गृहकार्य भइरहेको छ । पोखराको भौतिक पूर्वाधारको विकासको आवश्यकता, चक्रपथ निर्माणलगायतको विषयमा सङ्घीय सरकार सकारात्मक छ । 

नेपालको अर्थतन्त्रलाई आत्मनिर्भर बनाउने मेरो लक्ष हो । देशलाई हित हुने कुरा गर्दा कतिपयलाई चित्त बुझ्दैन । यति वेला दुई हजार मेगावाट मात्र विद्युत् हुँदा पनि ५ सय मेगावाट खेर जाने चिन्ता छ आज । जबकि १० हजार मेगावाट विद्युत् नेपालमै खर्च गर्ने योजना चाहिन्छ । मैले प्रतिस्थापन विधेयकमार्फत स्वदेशमै वि द्यूत खपत गर्ने उद्योगहरू स्थापना गर्ने गरी नीति ल्याएको छु । 

नेपालमा फलाम उद्योगहरू १५-१८ वटा चल्न सक्ने अवस्था छ । धौवाडी लगायतका फलाम खानीहरू सञ्चालनमा ल्याउनु छ । निर्माणको क्षेत्रमा हामी केही समयमै आत्मनिर्भर हुन सकिने अवस्था छ । 

रेमिट्यान्सलाई औपचारिक च्यानलमा आउने अवस्था सृजना गर्नु छ । उहाँहरूलाई केही प्रोत्साहन दिएर मात्र औपचारिक च्यानलमा ल्याउन सकिन्छ । हुन्डी घटाउने योजना आउदैछ । कृषि लगायतको क्षेत्रमा प्रवाह भएको सहुलियत ऋण दुरुपयोग नहोस् भनेर छलफल सुरु भएको छ । वैदेशिक लगानी भित्र्याउनको लागि पनि केही नयाँ नीतिगत लगानी गरिँदै छ । गैर आवासीय नेपालीहरूले नेपालको बैङ्कमा पैसा राख्न पाउने गरी केही नयाँ नीति बन्दै छ । 

निजी क्षेत्र बाँचेन भने सरकार पनि राम्रोसँग चल्न सक्दैन । उद्योग, व्यापार, व्यवसाय राम्रोसँग चलेन भने राजश्व सङ्कलन हुँदैन । यो कुरा सरकारले बुझेको छ । यसको लागि सहजीकरण गरिन्छ । कर प्रणालीलाई पनि सरलीकृत गर्ने गरी काम अघि बढ्दै छ । पर्यटन क्षेत्र केही चलायमान हुँदै छ । आन्तरिक पर्यटनको विस्तार गर्न सकिने क्षेत्रहरू धेरै छन् । यसको लागि आवश्यक योजना तथा कार्यक्रम ल्याइदैछ । 

देश निर्माणको लागि उत्पादनमूललक अर्थतन्त्र निर्माण गरौँ । उद्योग खोल्दा तपाई के सुविधा उपलब्ध गराउनुपर्छ त्यसको लागि सरकार तयार छ । कर छुट, भन्सार छुट , विद्युत्मा छुट आदिको व्यवस्था गर्न सरकार तयार छ । पुँजीगत खर्च बढाउनको लागि आज बिहान मात्र मैले भौतिक पूर्वाधार मन्त्रालयका मन्त्री सचिवसहितका पदाधिकारीहरूसँग छलफल गरेको छु । क्याबिनेट विस्तार लगायतका कतिपय राजनैतिक कामहरू बाँकी रहेकोले यसअघि पुँजीगत खर्च अपेक्षित गतिमा अघि बढ्न सकेको थिएन तर अब अघि बढ्न ।

पहिलो पटक राज्यको तर्फबाट गरिब परिवारलाई १० हजारका दरले राहत दिने प्रक्रिया सुरु भएको छ । तरलताको अभावले पुनर्कर्जा नपाइरहेको अवस्था हो भने त्यसलाई पनि सम्बोधन हुने गरी सरकारले काम गर्छ । 
सात प्रतिशत आर्थिक वृद्धि दरको लक्षलाई बेमौसमी वर्षाले असर पार्ने देखlएको छ । खरबौँको पूर्वाधार क्षति भयो, अरबौँको अन्नबाली क्षति भयो । 

धान बाली क्षतिबापतको रकम व्यवस्था गर्न साढे सात अर्ब बजेट थप खोज्नुपर्ने अवस्था आयो । उद्योगी व्यवसायीहरूका जायज माग सम्बोधन गर्ने काम सरकारले सुरु गरिसकेको छ ।