विश्वले टी–२० विश्वकपको नयाँ च्याम्पियन पाउँदै, अष्ट्रेलिया र न्यूजिल्याण्ड भिड्दै
हाम्रा कुरा
प्रकाशित २०७८ कार्तिक २८ आइतबार
1.4k
Shares
काठमाडौं । विश्वले आइतबार राति आईसीसी टी–२० क्रिकेटको नयाँ च्याम्पियन पाउँदैछ । यूएई र ओमानको संयुक्त आयोजनामा जारी आईसीसी टी–२० विश्वकप क्रिकेटको उपाधिका लागि आइतबार बेलुकी अष्ट्रेलिया र न्यूजिल्याण्ड भिड्दै छन् ।
खेल बेलुकी ७ः४५ बजे यूएईको दुबईमा शुरु हुँदैछ । न्यूजिल्याण्ड पहिलो पटक फाइनलमा पुगेको हो । अष्ट्रेलिया दोस्रो पटक फाइनलमा पुगेको हो ।
सेमिफाइनलमा अष्ट्रेलियाले पाकिस्तानलाई ५ विकेटले हरायो । अपराजित रहँदै सेमिफाइनलमा पुगेको पाकिस्तान अष्ट्रेलियाविरुद्ध भने निरीह बन्यो ।
त्यस्तै न्यूजिल्याण्डले पनि इङ्गल्याण्डलाई ५ विकेटले नै हराएको थियो । फाइनलमा पुगेको अष्ट्रेलियाले समूह चरणमा इङ्गल्याण्डसँग हार बेहोर्दा दक्षिण अफ्रिका, श्रीलंका, वेष्ट इन्डिज र बंगलादेशलाई हराएको थियो ।
न्यूजिल्याण्डले पाकिस्तानसँग पराजय बेहोर्दा भारत, अफगानिस्तान, नामिबिया र स्कटल्याण्डलाई हराएको थियो ।
हेड टु हेड
हेड टु हेडमा अष्ट्रेलिया हावी देखिएको छ । अहिलेसम्म दुवैले आपसमा १४ टी–२० खेलेका छन् । जसमा ९ खेल अष्ट्रेलियाले जितेको छ ।
न्यूजिल्याण्डले ५ खेलमात्र जितेको छ । टी–२० विश्वकपमा दुवैबीच एउटामात्र खेल भएको छ । उक्त खेलमा न्यूजिल्याण्ड विजयी भएको थियो ।
यो तथ्यांकअनुसार उपाधिका लागि न्यूजिल्याण्डको पहिलो दावेदारी देखिएको छ । तर अष्ट्रेलियाले जित्यो भने उपाधिसहित बदला लिएर १–१ को बराबरी पनि गर्नेछ ।
दुवै टिममा अनुभवी खेलाडीहरु भएकाले खेल प्रतिस्पर्धात्मक हुने अपेक्षा गरिएको छ ।
