रोकिराखेको भ्यान अर्कैले चलाउँदा दुर्घटना, एक बालकको मृत्यु

घाइतेलाई थप उपचारका लागि पोखरा ल्याइयो

हाम्रा कुरा

प्रकाशित २०७८ मंसिर ३ शुक्रबार

पोखरा । बागलुङको बुर्तिबाङमा पिकअप जीपले किच्दा एक बालकको मृत्यु भएको छ । मृत्यु हुनेमा तमानखोला गाउँपालिका वडा नं. २ का ८ वर्षीय जोन सिर्पालीको मृत्यु भएको हो ।

शुक्रवार बागलुङको ढोरपाटन नगरपालिका वडा नंं १ बुर्तिबाङको फाँट बजारमा जिपले किच्दा सिर्पालीको मृत्यु भएको हो ।

दुर्घटनामा अन्य ६ जना घाइते भएका छन् । घाइते भएकामध्ये फाँट बजारमा व्यवसाय गर्दै आएका ढोरपाटन नगरपालिका वडा नं. ५४८ वर्षीष लेवेन्द्र कुँवर, ढोरपाटन नगरपालिका वडा नं. १ का नरकिताब सुनार, ढोरपाटन ५ का विष्णु सापकोटा, ढोरपाटन ५ का सक्रेनी घर्ती, ढोरपाटन ५ का नरमला घर्ती, ढोरपाटन नगरपालिका ७ बस्ने निमसरा घर्तीका ९ वर्षीय छोरा आकाश घर्ती छन् ।

घाइते कुँवरको बायाँ खुट्टामा गम्भीर चोट लागेको भने ढोरपाटन १ का नरकिताव सुनारको हात र खुट्टामा गम्भीर चोट लागेको बताइएको छ ।

उनीहरूको उपचारका लागि हेलिकप्टरमार्फत पोखरा ल्याइएको छ । अन्य घाइतेहरूको हात खुट्टा र ढाडमा चोट लागेको र बुर्तिबाङ प्राथमिक स्वास्थ्य केन्द्रमा उपचार भइरहेको छ ।

बुर्तिबाङ फाँटबजारमा पिकअप रोकेर चालक केरबहादुर विक नजिकैको पसलमा सामान राख्न बाहिर निस्किएको अवस्थामा स्थानीय नमबहादुर मल्लले पिकअप चलाउन खोजेपछि दुर्घटना भएको पाइएको छ ।

पिकअपसहित पिकअप चालक र पिकअप चलाएर दुर्घटना गराउने मल्ललाई इलाका प्रहरी कार्यालय बुर्तिबाङले नियन्त्रणमा लिएको इलाका प्रहरी कार्यालय बुर्तिबाङ प्रमुख जयराम वन्तले जानकारी दिए ।