पैदलयात्रीलाई ठक्कर दिएर भाग्ने क्रममा मुकेशको बिजुलीको पोलमा ठोक्किएर मृत्यु

हाम्रा कुरा

प्रकाशित २०७८ पुष ११ आइतबार

सर्लाही । सर्लाहीको ईश्वरपुर नगरपालिका वडा नं. ९ खोरिया टोलमा आइतबार पैदलयात्रीलाई ठक्कर दिएर भाग्ने क्रममा मोटरसाइकल चालकको बिजुलीको पोलमा ठोक्किएर मृत्यु भएको छ ।

आइतबार दिउँसो पौने ४ बजेतिर बयलवास बजारबाट मोहनपुरतर्फ जाँदै गरेको प्रदेश २ ०२ ००३ प ७७१३ नम्बरको मोटरसाइकलले दुई जना पैदलयात्रीलाई ठक्कर दिएपछि चालकले मोटरसाइकल लिएर भाग्न खोजेका थिए ।

त्यस क्रममा सडक छेउको बिजुलीको पोलमा मोटरसाइकल ठोक्किँदा चालक बरहथवा नगरपालिका १० शान्तिटोल बस्ने अच्छेलाल सिंह दनुवारका छोरा ३५ वर्षीय मुकेश सिंह दनुवारको मृत्यु भएको प्रहरीले जनाएको छ ।

दुर्घटनामा गम्भीर घाइते भएका मुकेशलाई उपचारका लागि जिल्ला अस्पताल मलंगवा लाँदा चिकित्सकले मृत घोषणा गरेको इलाका प्रहरी कार्यालय केशरगञ्जका प्रहरी निरीक्षक (इन्स्पेक्टर) जनकराज ढुङ्गानाले बताए ।

मोटरसाइकलको ठक्करबाट पैदलयात्री ईश्वरपुर नगरपालिका ९ का ७० वर्षीय महेन्द्र साह र सोही ठाउँ बस्ने सरोज कुमार महतोकी छोरी वर्ष १५ की रञ्जना कुमारी महतो घाइते भएका छन् ।

निधार र नाकामा चोट लागेर गम्भीर घाइते महेन्द्र साहलाई बयलवासमा सामान्य उपचार गरी थप उपचारका लागि जनकपुर रेफर गरिएको छ भने सामान्य घाइते रञ्जना कुमारीको बयलवासमै उपचार चलिरहेको प्रहरीले जनायो ।

प्रत्यक्षदर्शीका अनुसार मोटरसाइकलले सुरुमा रञ्जना कुमारीलाई ठक्कर दिएको थियो । त्यसपछि चालकले मोटरसाइकल लिएर भाग्न खोज्दा ७० वर्षीय वृद्ध महेन्द्र साहलाई ठक्कर दिएर बिजुलीको पुलमा गएर ठोक्किएको हो ।