तीव्र आलोचनापछि पदमुक्तको चार महिना ढिला गरी सरकारी गाडी फिर्ता गर्दै शेरधन राई

तीव्र आलोचनापछि पदमुक्तको चार महिना ढिला गरी सरकारी गाडी फिर्ता गर्दै शेरधन राई

हाम्रा कुरा

प्रकाशित २०७८ पुष १७ शनिबार

विराटनगर । प्रदेश १ पूर्वमुख्यमन्त्री शेरधन राईले पदमुक्तको चार महिनापछि मात्र सरकारी गाडी फिर्ता गर्ने भएका छन् । चार महिनाअघि मुख्यमन्त्रीबाट हटे पनि सरकारी सेवासुविधा उपभोग गर्दै आएका राईको तीव्र आलोचना भएपछि उनले अहिले आएर गाडी फिर्ता गर्न लागेका हुन् ।

उनले काठमाडौंमा गाडी फिर्ता गरेको प्रदेश १ का आर्थिक मामिला तथा योजना मन्त्रालयका सचिव सुमन दाहालले पुष्टि गरे । ‘गाडी लिन आउनुहोस् भनेर माननीयज्यूले फोन गर्नुभयो’, दाहालले भने, ‘मन्त्रालयबाट ड्राइभर पठाएर अब गाडी ल्याउने तयारी भइरहेको छ ।’

मुख्यमन्त्रीको पदावधि सकिएपछि सेवासुविधाको विषयमा प्रदेश सरकारले अहिलेसम्म कुनै कानून बनाएको छैन । कानूनमा नै नभएको सेवासुविधा राइले ४ महिना प्रयोग गरे । राईले गत भदौमा मुख्यमन्त्री पदबाट राजीनामा दिएका थिए ।