एथलेटिक्स खेलाडीलाई बिदाइ, ट्रफि बोकेरै स्वदेश फर्कनेमा मन्त्री विश्वस्त

हाम्रा कुरा

प्रकाशित २०७८ पुष २२ बिहिबार

काठमाडौं । बङ्गलादेशमा हुने “बंगबन्ध शेख मुजीव बन्धु म्याराथन” प्रतियोगितामा सहभागी हुने नेपाली खेलाडीहरूलाई बिदाइ गरिएको छ । बिहीबार युवा तथा खेलकुद मन्त्री महेश्वर गहतराज (अथक) ले खेलाडी तथा प्रशिक्षकलाई बिदाइ गरेका हुन् ।

मन्त्रालयको सभा हलमा आयोजित बिदाइ कार्यक्रममा खेलाडीहरूलाई बिदाइ गर्दै मन्त्री अथकले जितको अग्रिम शुभकामना दिए । विगतमा दौडिएरै राजा हुने ऐतिहासिक विरासत बोकेको देशका खेलाडीलाई विश्वका कुनै शक्तिले हराउन नसक्ने बताउँदै मन्त्री अथकले नेपाली खेलाडीहरू ट्रफि बोकेरै स्वदेश फर्कनेमा आफू विश्वस्त रहेको उल्लेख गरे ।

पछिल्लो समय खेलाडीहरूको सम्मानकालागि सरकार गम्भीर भएको बताउँदै मन्त्री अथकले भने, “हामी पुरस्कार तथा सम्मान कार्यविधि बनाउँदाबनाउँदै, जसमार्फत खेलाडीहरूलाई पुरस्कारको अग्रिम सुनिश्चितताको व्यवस्था हुनेछ ।”

जनवरी १० (पौष २६) गते बङ्गलादेशमा हुने म्याराथनमा १५ राष्ट्रको सहभागिता हुने नेपाली टिमका प्रशिक्षक चन्द्र गुरुङले जानकारी दिए । ४२ किलोमिटर दुरीको फुल म्याराथन प्रतियोगितामा सहभागी हुन गुरुङको नेतृत्वमा नरेन्द्र सिंह रावत, किरण बोगटी र पुष्पा भण्डारी बङ्गलादेश जान लागेका हुन् ।