१५ दिनमा कार्यसम्पादन रिपोर्ट दिन मन्त्रीको निर्देशन
हाम्रा कुरा
प्रकाशित २०७८ पुष २३ शुक्रबार
656
Shares
काठमाडौं । शिक्षा, विज्ञान तथा प्रविधि मन्त्री देवेन्द्र पौडेलले शिक्षा मन्त्रालय अन्तर्गतका विभागीय प्रमुखलाई १५ –१५ दिनभित्रको कार्यसम्पादनको रिपोर्ट बुझाउन निर्देशन दिएका छन् । शुक्रवार विभागीय प्रमुखलाई मन्त्रालयमा बोलाएर मन्त्री पौडेलले १५ १५ दिनको कार्यसम्पादनको रिपोर्ट बुझाउन निर्देशन दिएका हुन् ।
'एक हप्तामा गर्न सक्ने काम के के हुन् टिपोर्ट गर्नुहोस्' मन्त्री पौडेलले भने, 'अर्को हप्ता काम गरी नतिजा निस्किने गरी काम हुनपर्यो होइन भने कारण चाहियो ।'
मन्त्री पौडेलले ५० औं वर्षदेखि अड्किएका फाइलहरूको विषयमा अध्ययन गरी टुङ्ग्याउन सक्ने काम तत्काल गर्न निर्देशनसमेत दिए । 'फाइलहरू अड्काएर हुँदैन, मन्त्रीहरू फेरिरहने हुन्छ, सेवा ग्राहीको पनि आशा हुन्छ,' उनले भने 'हप्ता दिन अध्ययन गरेर हुने नहुने निर्णय दिनुहोस् ।'
शिक्षा मन्त्रालयबाट गरिब, जेहेन्दार तथा असहाय विद्यार्थीलाई दिने छात्रवृत्ति नरोक्न विभागीय प्रमुखलाई निर्देशन दिए । 'कुनै पनि छात्रवृत्तिको पैसा फिर्ता हुन भएन,' मन्त्री पौडेलले भने, 'छात्रवृत्ति समयमा विद्यार्थी स्तरमा पुग्नुपर्यो फिर्ता हुँदा सन्देश राम्रो जाँदैन ।'
मन्त्रालयले बनाएको लक्ष्य पुरा गर्न कर्मचारीमा सङ्कल्प, इच्छा शक्ति र सक्रियता हुनुपर्नेमा जोड दिँदै उनले देश बनाउने जनशक्ति उत्पादन गर्ने थलो शिक्षा मन्त्रालय भएको बताए । 'कमान्ड कन्ट्रोल हुनुपर्छ, त्यसो भएन भने भद्रगोल हुन्छ,' मन्त्री पौडेलले भने, 'समस्या छन् भने सचिवमार्फत ल्याउनुहोस् ।'
यस्तै शिक्षा, राज्यमन्त्री बोधमाया यादवले विद्यालयमा समयमा नै पाठ्यपुस्तक पुर्याउन अहिलेदेखि नै लाग्नुपर्ने बताए ।
