चार प्रतिशत रहेको संक्रमण दर माघ पहिलो साता ४२ प्रतिशत पुग्यो
मृत्यु हुनेको संख्या ३ गुणाले बढ्यो
हाम्रा कुरा
प्रकाशित २०७८ माघ ८ शनिबार
448
Shares
काठमाडौं । नेपालमा दुई साता यता कोरोना भाइरसको संक्रमण भयावह तरिकाले बढेको छ । पुस तेस्रो साता करिब ४ प्रतिशत रहेको संक्रमण दर माघ पहिलो सातामै ४२ प्रतिशत पुगेको छ ।
पुस तेस्रो साता अर्थात् पुस १८ देखि २४ गतेसम्मको तथ्याङ्क हेर्दा सङ्क्रमण दर ४.७७ प्रतिशत रहेको थियो । त्यससाता ८० हजार ५० जनाको नमुना परीक्षण हुँदा ३,८२२ जनामा सङ्क्रमण पुष्टि भएको थियो ।
माघ पहिलो सातासम्म आइपुग्दा १ गतेदेखि ७ गतेसम्मको तथ्यांक अनुसार संक्रमण दर भयावह तरिकाले बढेर ४२.३६ प्रतिशत पुगेको छ । यसअवधिमा १ लाख ४३ हजार ९ सय ६० जनाको नमुना परीक्षण गर्दा ६० हजार ९ सय ८२ जनामा संक्रमण पुष्टि भएको छ ।
स्वास्थ्य तथा जनसंख्या मन्त्रालयको तथ्यांक बिश्लेषण गर्दा नेपालमा संक्रमण ह्वात्तै बढेको देखिएको हो । यसको अर्थ प्रत्येक सय जनाको नमुना परीक्षण गर्दा ४२ जनामा संक्रमण पुष्टि भइरहेको हो ।
माघ पहिलो साता अर्थात् माघ १ गतेदेखि ७ गतेसम्म १ लाख ४३ हजार ९ सय ६० जनाको नमुना परीक्षण गरिएको छ । तीमध्ये ६० हजार ९ सय ८२ जानमा संक्रमण पुष्टि भएको छ ।
यसअवधिमा ३ हजार ९ सय २२ जना मात्रै संक्रमणमुक्त भएका छन् भने, २२ जनाको मृत्यु भएको छ ।
पुस तेस्रो सातामा सात दिनमा ८ जनाको मात्रै मृत्यु भएको थियो । माघ पहिलो साता मृत्यु हुनेको संख्या समेत झन्डै ३ गुणाले बढेको देखिन्छ ।
गत पुस ११ देखि १७ गतेसम्म सङ्क्रमण दर २.२९ प्रतिशत रहेको थियो । सो साता ७९ हजार ६७७ जनाको नमुना परीक्षण गर्दा १,८३२ जनामा सङ्क्रमण पुष्टि भएको थियो ।
झन्डै एक साताको अन्तरमै संक्रमण दर ४ प्रतिशतबाट सोझै ४२ प्रतिशत पुग्नु आफैमा भयावह अवस्था देखिएको छ । पछिल्ला दिनहरुमा खोप लगाउन जानेको भीडले समेत संक्रमण बढाउने चिन्ता देखिएको विज्ञहरुको भनाइ छ ।
संक्रमण र मृत्यु हुनेको संख्या उग्ररुपमा बढ्दा समेत मानिसहरुले स्वास्थ्य मापदण्डको पालनामा भने लापरवाही गरेको अधिकारीहरुको भनाइ छ ।
