युक्रेन कब्जा गर्न रुसको ७० प्रतिशत तयारी पूरा : अमेरिकी अधिकारी

हाम्रा कुरा

प्रकाशित २०७८ माघ २३ आइतबार

काठमाडौं। रुसले पूर्ण रुपमा युक्रेन कब्जा गर्न आवश्यक सैन्य शक्तिको ७० प्रतिशत सैन्य शक्ति तयार पारी ठीक स्थानमा राखिसकेको दुई अमेरिकी अधिकारीहरुले रोयटर्सलाई बताएका छन् ।

रुसले युक्रेनी सीमामा थप बटालियन रणनीतिक समूहहरू पठाइरहेको समेत ती अधिकारीहरुले बताएका छन् । पछिल्लो दुई हप्तामा रुसले युक्रेनी सीमा क्षेत्रमा बटालियन रणनीतिक समूहको संख्या ६० बाट बढाएर ८३ पुर्याएको छ ।

र थप १४ लडाकु समुह ट्रान्जिटमा रहेको ती अमेरिकी अधिकारीले नाम नखुलाउने शर्तमा बताएका छन् ।

आक्रमणको समय अनुसार फेब्रुअरी १५ को आसपासमा स्थिती चरम अवस्थामा पुग्ने अपेक्षा गरिएको छ । र यो अवस्था मार्चको अन्त्यसम्म रहन सक्ने अनुमान गरिएको छ ।

रुसले युक्रेनी सीमा नजिक १ लाख भन्दा बढी सेनाहरू जम्मा गरे पनि आक्रमणको योजना नरहेको बताएको छ ।

तर, नेटोले युक्रेनलाई कहिल्यै स्वीकार नगर्ने र अन्य सुरक्षा शर्त राख्दै ती माग पूरा नभएमा जुनसुकै किसिमको कारबाही गर्न सक्ने रुसी चेतावनी छ ।

यस्तो अवस्थामा रुसले सीमित घुसपैठ सहित पूर्ण स्तरीय आक्रमण बाहेकका अन्य विकल्पहरू रोज्न सक्ने वाशिंगटनको भनाइ छ । तर, यस बिषयमा रुसी राष्ट्रपति भ्लादिमिर पुटिनले अन्तिम निर्णय नगरेको ठानिएको छ ।

तर, पुटिनले सबै परिदृश्यहरू कार्यान्वयन गर्न सक्ने शक्ति राखिरहेको अमेरिकी अधिकारीहरुको भनाइ छ ।

यदि रुसले युक्रेनको राजधानी कीभमा आक्रमण गर्‍यो भने, केही दिनभित्रै यसको पतन हुने अमेरिकी अधिकारीहरुको आंकलन छ ।

यस्तो आक्रमणले ५ हजारदेखि २५ हजार युक्रेनी सेना हताहत हुनसक्ने र ३ हजारदेखि १० हजार रुसी सेना हताहत हुनसक्ने अनुमान गरिएको छ । यस्तै २५ हजारदेखि ५० हजार नागरिकसमेत हताहत हुनसक्ने अमेरिकी आंकलन छ ।

यस्तै युक्रेनमाथि रुसी पूर्ण आक्रमणले युरोपमा लाखौं शरणार्थी र आन्तरिक रूपमा विस्थापित व्यक्तिहरूको उडानलाई पनि प्रेरित गर्ने समेत अमेरिकी अनुमान छ ।