राजमार्ग बन्द गराउन खोज्ने नेकपा क्रान्तिकारी माओवादीका कार्यकर्ता पक्राउ

हाम्रा कुरा

प्रकाशित २०७८ फागुन ४ बुधबार

सिरहा। सिराहाबाट प्रहरीले नेकपा क्रान्तिकारी माओवादीको केन्द्रीय सदस्यसहित १० जना बन्दकर्तालाई पक्राउ गरेको छ। एमसीसीको विरोधमा राजमार्ग बन्द गराउन निस्केका बन्द कर्तालाई प्रहरीले नियन्त्रणमा लिएको हो।

पक्राउ पर्नेमा मोहन वैद्य नेतृत्वको नेकपा क्रान्तिकारी माओवादीका केन्द्रीय सदस्य रामनारायण सिंह, मधेस प्रदेश संयोजक तथा जिल्ला सेक्रेटरी सञ्जय सिंह, शम्भु साह, रञ्जित साह, विष्णुलाल सिंह, राम किशोर दास, विप्लव समूहको नेपाल कम्युनिस्ट पार्टीको जिल्ला संयोजक राजु वि.क., उचित महरा, भक्तबहादुर कार्की, क. क्रान्ति रहेका छन्।

मोहन वैद्य नेतृत्वको नेकपा क्रान्तिकारी माओवादी, विप्लव नेतृत्वको नेपाल कम्युनिस्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजित बुढाथोकी नेतृत्वको नेकपा माओवादी केन्द्र समाजवादी तथा सिपी गजुरेल नेतृत्वको देशभक्त गणतान्त्रिक मोर्चाले नेपाल बन्दको आह्वान गरेका थिए।