काठमाडौं । विवादमा आएका अर्थमन्त्री जनार्दन शर्माले संसदमा स्पष्टीकरण दिएका छन् । सभामुख अग्निप्रसाद सापकोटाले सार्वजनिक महत्वको विषयमा वक्तव्य दिनलाई बोलाएपछि एमालेका सांसदहरु भने अलमलमा देखिए । 

यसअघि बिहान बैठकको शुरुआतमै एमालेले शर्मासँग कुनै सवाल जवाफ नगर्ने बताएका थिए । 

तर अहिले आएर अर्थमन्त्रीले घुमाउरो पाराले वक्तव्य दिएपछि एमाले पनि सहभागी भएर चर्को आलोचना गरेको छ । 

एमालेका प्रमुख सचेतक विशाल भट्टराईले अर्थमन्त्री शर्मामाथि करका दर तय गर्न मन्त्रालयले नचिन्ने मान्छेहरु छिरेकोसमेत आरोप लगाए । 

उनले त्यतिबेलाको सीसीटीभीको फुटेजसमेत देखाउन माग गरेका छन् । दुनियाँमा कुनै पनि बदमासले गल्ती गरेको छु भनेर नभन्ने गरेकोसमेत भट्टराईले भने । 

संसदीय छानबिन समिति नबनेसम्म संसद अगाडि बढ्न नसक्ने भन्दै एमाले सांसदहरु उभिएर विरोध गरिरहेका छन् । 

सभामुख सापकोटाले भने एमाले सांसदहरुलाई सदन अगाडि बढाउन आग्रह गरेका छन् । अहिले संसद अवरुद्ध भएको छ । 

एमाले सांसदहरु उभिएर विरोध गरिरहेपछि सभामुख सापकोटाले आजका बाँकी कार्यक्रमहरु स्थगित भएको जनाएका छन् । 

अर्को बैठक बुधबार ११ बजे बस्ने गरी स्थगित भएको छ । 

यसअघि बिहान अर्थमन्त्री शर्माको विवादका कारण फेरि अर्थमन्त्रालय बारेमा छलफल नगर्ने भन्दै प्रमुख प्रतिपक्ष दल नेकपा एमालेले विरोध गरेको थियाे । 

‘अर्थमन्त्रीज्यूको काम क्रियाकलापप्रति विवाद आइरहेका बेलामा अब अर्थमन्त्रीको कार्यक्रममा सहभागी नहुने’ मंगलबार बिहान संसदमा नेकपा संसदीय दलका प्रमुख सचेतक विशाल भट्टराईले जानकारी गराएका थिए । त्यसपछि एमालेका सांसदहरु सिटबाट उठेका थिए । आफ्नो ध्यानाकर्षण भएको भनी सभामुख अग्निप्रसाद सापकोटाले भनेसँगै एमालेका सांसदहरु सिटबाट बसेर संसदमा भाग लिएका थिए । 

के भन्छन् शर्मा ? 
शर्माले आफूले गलत काम नगरेको दाबी गरेका छन् । उनले नाजायज व्यक्ति अर्थं मन्त्रालयमा नगएको पनि दाबी गरेका छन् । आफूलाई लागेका आरोप कपोलकल्पित भएको भन्दै खारेज गर्छु भनेका थिए ।