काठमाडौं । भारत र रुसको संयुक्त रक्षा उद्यम ब्रह्मोस एयरोस्पेस कम्पनीले आगामी पाँचदेखि छ वर्षमा भारतमै हाइपरसोनिक मिसाइल बनाइसक्ने घोषणा गरेको छ ।

'ब्रह्मोस एरोस्पेस हाइपरसोनिक मिसाइल बनाउन सक्षम छ। पाँचदेखि छ वर्षमा हामी हाम्रो पहिलो हाइपरसोनिक क्षेप्यास्त्र ब्रह्मोस द्वारा बनाउन सक्षम हुनेछौं,' ब्रह्मोस एयरोस्पेसका सीईओ र एमडी अतुल राणेले रजत जयन्ती वर्ष समारोह (१९९८-२०२३)मा बोल्दै भनेका छन् ।

भारतले विश्वको सबैभन्दा राम्रो, छिटो र शक्तिशाली अत्याधुनिक परिशुद्धता स्ट्राइक हतियार ब्रह्मोसको सफल उत्पादनलाई लिएर रजत जयन्ती वर्ष समारोहसँगै सफलता मनाएको छ ।

भारतको स्वतन्त्रताको ७५ वर्षको साथमा ब्रह्मोस एरोस्पेसले सोमबार 'रजत जयन्ती वर्ष' (२०२२-२०२३) शुरु गरेको छ । अपराजेय ब्रह्मोसको पहिलो सुपरसोनिक प्रक्षेपणको २१ औँ गौरवशाली वार्षिकोत्सव मनाउन जुन १२ मा शुरु हुने रजत जयन्ती वर्ष समारोह २०२३ को फेब्रुअरी १२ मा ब्रह्मोस स्थापना दिवसमा समापन हुनेछ।

रजत जयन्ती वर्षको अवसरमा जेभी (जाेइन्ट भेन्चर) संस्थाले धेरै प्रमुख कार्यक्रमहरू, बैठकहरू र राष्ट्रिय स्तरका प्रतियोगिताहरू आयोजना गर्ने योजना बनाएको छ ।

जसमा जेभीका प्रमुख उद्योग साझेदारहरूले गरेको अमूल्य योगदानलाई सम्मान एवं हाइलाइट गर्नका लागि उद्योग साझेदारहरूको बैठकसमेत समावेश गरिएको छ। यसका साथै देशभित्र मिसाइल निर्माण उद्योग इकोसिस्टमको विकासमा समेत छलफल हुनेछ ।

यसका साथै विश्वको उत्कृष्ट सुपरसोनिक क्रुज मिसाइल प्रणाली सञ्चालन गर्ने भारतीय सशस्त्र बलको योगदान र व्यावसायिकतालाई सम्मान गर्न प्रयोगकर्ता अन्तरक्रिया बैठक हुनेछ।

मिसाइल टेक्नोलोजीको क्षेत्रमा युवा प्रतिभाहरूलाई उन्मुख गर्ने र अघि बढाउने उद्देश्यले मिसाइल र एयरोस्पेस क्षेत्रमा अत्याधुनिक प्रविधि र यसको प्रयोगसम्बन्धी राष्ट्रिय स्तरको प्रतियोगिता आयोजना गरिनेछ।

भव्य समारोहहरू ब्रह्मोस स्थापना दिवसका अवसरमा सन् २०२३ को फेब्रुअरी १२ मा समाप्त हुनेछ । जसमा महत्त्वपूर्ण कार्यक्रमहरु समावेश रहने छन् ।

रजत जयन्ती वर्ष समारोहको एक भागको रूपमा कम्पनीले आफ्नो कर्पोरेट सामाजिक उत्तरदायित्व (सीएसआर) कोषको उचित हिस्सा भारतभर महिला सशक्तिकरण सम्बन्धी कार्यक्रमहरू र परियोजनाहरूमा खर्च गर्ने घोषणा गरेको छ।

दुई दशकभन्दा बढीको आफ्नो शानदार यात्रामा ब्रह्मोस एयरोस्पेसले धेरै ऐतिहासिक कोसेढुङ्गाहरू हासिल गरेको छ ।

यस महत्वाकांक्षी यात्राको अर्को चरणको लागि पाठ्यक्रम तयार गर्दै जेभीले यूपी डिफेन्स इन्डस्ट्रियल करिडोर (युपीडीआईसी) को भागको रूपमा उत्तर प्रदेशको लखनऊमा आफ्नो नयाँ अत्याधुनिक ब्रह्मोस निर्माण केन्द्रमा काम शुरु गरेको जनाएकाे छ।

जुन ३ मा भारतीय प्रधानमन्त्री नरेन्द्र मोदीले यूपीडीआईसी अन्तर्गत सबै ठूला औद्योगिक परियोजनाहरूको प्रारम्भ गर्नको लागि एक ग्राउन्ड ब्रेकिंग समारोह आयोजना गरेका थिए ।

जसअन्तर्गत उच्च उन्नत ब्राह्मोस नेक्स्ट जेनेरेशन (एनजी) हतियार प्रणालीको डिजाइन, विकास र उत्पादन गर्ने फेसिलिटीसमेत रहेको छ ।

ब्रह्मोस एयरोस्पेसले उत्तर प्रदेशमा ३०० करोडको प्रारम्भिक लगानीमा नयाँ निर्माण केन्द्र स्थापना गर्न करिब ८० हेक्टर जमीन प्राप्त गरेको छ। 

कम्पनीले २०२४ को मध्यसम्ममा नयाँ सुविधा स्थलमा सबै उत्पादन सम्बन्धित कार्यहरू पूरा गर्ने योजना बनाएको छ। पूर्ण रूपमा सञ्चालनमा आएपछि सुविधाले प्रत्येक वर्ष ८० देखि १०० वटा ब्राह्मोस प्रणालीहरू उत्पादन गर्नेछ।

ब्राह्मोस एनजी मिसाइलको काम पनि अघि बढेको छ र आगामी तीनदेखि पाँच वर्षमा सिरियल उत्पादनका लागि तयार हुनेछ । 

ब्राह्मोस एनजी निर्माण केन्द्रले भारतको मिसाइल उद्योग कन्सोर्टियमलाई अझ बलियो बनाउने छ र उच्च क्षमताको मिसाइल प्रविधिको लागि रक्षा इकोसिस्टमलाई बलियो बनाउन मद्दत गर्नेछ। यसले भारतलाई विश्वको शीर्ष श्रेणीको रक्षा प्रविधि केन्द्रको रूपमा पनि स्थान दिनेछ।

सुपरसोनिक क्रुज मिसाइल भारतीय सशस्त्र बलका तीन वटै सेवाहरू ( सन् २००५ मा भारतीय नौसेनामा, २००७ मा भारतीय सेनामा र २०२० मा भारतीय वायुसेनामा) सफलतापूर्वक सञ्चालनमा ल्याइएको छ ।

एकपछि अर्को अविश्वसनीय रफ्तार र शानदार सफलता हात पारेपछि विश्व स्तरीय क्षमताको ब्रह्मोस छिमेकी मुलुकमा निर्यात गरिएसँगै भारतको सैन्य निर्यात मोर्चामा पहिलो र प्रमुख हतियार प्रणाली बन्न सफल भएको छ ।

जनवरी २८ मा ब्राह्मोस एरोस्पेसले फिलिपिन्सको नौसेनालाई किनारमा आधारित एन्टी शिप ब्रह्मोस प्रणाली प्रदान गर्न फिलिपिन्स गणतन्त्रसँग ऐतिहासिक सम्झौतामा हस्ताक्षर गरेको थियो ।

'मेक-इन-इन्डिया' र 'डिजाइन-इन-इन्डिया' को  झण्डा बोकेको ब्रह्मोस एयरोस्पेसले अब 'मेक-फर-द-वर्ल्ड' मा जाने तयारी गरिरहेको छ ।

करोडौं डलरको ब्रह्मोस हतियार प्रणाली निर्यात सम्झौताले आगामी केही वर्षहरूमा विश्वमा शीर्ष स्तरीय सैन्य निर्माता र निर्यातकको रूपमा उभिने भारतको आकांक्षाको लागि मार्ग प्रशस्त गरेको छ।