अर्थमन्त्री प्रकरण : सीसीटीभी फुटेजको खोजीमा समिति
हाम्रा कुरा
प्रकाशित २०७९ साउन २ सोमबार
477
Shares
काठमाडौं । संसदीय विशेष समिति सीसीटीभी फुटेजको खोजीमा रहेको छ । तत्कालीन अर्थमन्त्री जनार्दन शर्माले बजेटमा करको दर हेरफेरका सम्बन्धमा गठित छानबिन समितिलाई अर्थ मन्त्रालयले आजसम्म सीसीटीभी फुटेज दिएको छैन ।
गत मङ्गलवार बसेको छानबिन समितिको बैठकले बिहीबार भित्र अर्थ मन्त्रालयका सीसीटीभी फुटेज उपलब्ध गराउन निर्देशन दिएको थियो । तर मन्त्रालयले बजेट निर्माणको समयको नभई अर्को महिनाको फुटेज दिएको छ ।
समितिले दुई पटक ताकेता गर्दा पनि जेठको सीसीटीभी फुटेज मन्त्रालयले पाएन । तर असार महिनाको फुटेज भने समितिलाई मन्त्रालयले थमाइदिएको छ ।
फुटेज नपाएपछि बुधवार संसदीय विशेष छानबिन समितिले अर्थ मन्त्रालयमा स्थलगत अवलोकनमा पुगेको थियो । निरीक्षणका क्रममा सीसीटीभी कहाँकहाँ तथा कुन कुन कार्यकक्षमा जडान गरिएका तथा सिसिटिभीको संरचना र नियन्त्रण कसरी गरिएको छ भन्ने सम्बन्धमा समितिले जानकारी लिएको थियो ।
बजेटमा करको दर हेरफेरका सम्बन्धमा ११ सदस्यीय समिति गठन गरिएको छ ।
यसअघि उपभोक्ता हित संरक्षण मञ्चलाई बजेट निर्माणको रातको सीसीटीभी फुटेज नभएको अर्थ मन्त्रालयले जानकारी दिएको थियो ।
मन्त्रालयले सीसीटीभी फुटेज मन्त्रालयमा जडान भएको सीसीटीभीको क्षमता र जडान भएको क्यामेराको आधारमा बढीमा १३ दिनसम्मको मात्रै सीसीटीभी फुटेज अभिलेखमा रहने भन्दै आएको छ ।
मन्त्रालयमा बजेट निर्माणमा अनधिकृत व्यक्ति छिराई निश्चित स्वार्थ समूहलाई फाइदा पुऱ्याउने काम गरेको आरोप लागेपछि अर्थमन्त्रीले राजीनामा दिएका थिए ।
