-
-
-
-
काठमाडौं । भारतीय महिला क्रिकेट टिमले पाकिस्तानी महिला क्रिकेट टिमलाई पराजित गरेको छ । इङ्गल्याण्डमा जारी कमनवेल्थ गेम्स महिला क्रिकेटमा भारतले पाकिस्तानलाई सहजै हराएको हो ।
बर्मिङघममा भएको समूह ए को खेलमा भारत ८ विकेटले विजयी भयो । खेलमा पहिले ब्याटिङ गरेको पाकिस्तानले निर्धारित १८ ओभरमा झारिएको खेलमा ९९ रनमा अलआउट भयो ।
ओपनर मुनिबा अलीले सर्वाधिक ३२ रन बनाएको इनिङ्समा स्नेह राना र राधा यादवले २–२ विकेट लिए ।
जवाफमा भारतले ११.४ ओभरमै २ विकेट गुमाएर जित हासिल गर्यो । स्मृति मन्धनाले ४२ बलमा अविजित रहँदै ६३ रनको योगदान दिइन् ।
यो जितसँगै भारतले जितको खाता खोलेको छ । पहिलो खेलमा भारत पराजित भएको थियो । भारत दोस्रो स्थानमा पुगेको छ । शीर्ष स्थानको अष्ट्रेलियाको दुई खेलमा चार अंक छ ।
