बालेन्द्रले भने - अपराधीहरूलाई कानून बमोजिम कडा कारबाही हुनुपर्छ
हाम्रा कुरा
प्रकाशित २०७९ साउन २५ बुधबार
596
Shares
काठमाडौं । काठमाडौंको फोहोर बोकेर बञ्चरेडाँडातर्फ गएका गाडीमाथि अज्ञात समूहले तोडफोड गरेका छन् । सोमवार राति काठमाडौंको फोहोर बोकेका गाडी अज्ञात समूहले तोडफोड गरेको हो ।
सिस्डोल–बञ्चरेडाँडा सडकखण्डको आलेटार भन्ने ठाउँमा अज्ञात समूहले टिपर र डोजर तोडफोड गरेपछि महानगरपालिकाका मेयर बालेन्द्र शाहले फोहोर व्यवस्थापनलाई निष्कर्षमा पुग्न नदिन चलखेल भएको प्रतिक्रिया दिएका छन् ।
काठमाडौं महानगरपालिका अनुसार १४ वटा फोहोरका गाडी र सडक मर्मतमा प्रयोग भएका ३ वटा डोजर तोडफोड भएको हो ।
उनले केही व्यक्ति वा समूहको स्वार्थपूर्तिका लागि लाखौँ नागरिक तथा २१ वटा पालिकाको फोहोरलाई अव्यवस्थित र असर पार्न नसकिने बताएका छन् ।
मेयर शाहले सामाजिक फोहोर बोक्ने साधनहरूको तोडफोड जघन्य अपराध रहेको बताउँदै अपराधीहरूलाई कानून बमोजिम कडा कारबाही हुनुपर्छ भन्नेमा महानगर स्पष्ट रहेको बताए ।
उनले साधनहरू तोडफोड गर्नेहरूबाट नै यसको भरपाई तथा क्षतिपूर्ति तिराउने भन्दै यसका लागि महानगरले सम्बन्धित संयन्त्र तथा निकायहरूसँग समन्वय गरिरहेको उल्लेख गरेका छन् ।
