काठमाडौं । एसियाकै धनाढ्य भारतका उद्यमी गौतम अडानी समूहको एक डिभिजन एएमजी मिडिया नेटवर्कले नयाँ दिल्ली टेलिभिजन लिमिटेड (एनडीटीभी)को २९.१८ प्रतिशत शेयर खरिद गरेको छ । यस्तै एएमजी मिडिया नेटवर्कले थप २६ प्रतिशत सेयर खरिदका लागि खुला प्रस्ताव राख्ने भएको छ ।

अदानी एन्टीटीजले एनडीटीभीको २६ प्रतिशत शेयर २९४ रुपैयाँ प्रति शेयरका दरले ४९३ करोड रुपैयाँको खुला प्रस्ताव गरेको छ। यससँगै मिडिया जायन्टको सेयर बुधबार ५ प्रतिशतले बढेर रु ३७६.५५ प्रति शेयरमा पुगेको छ ।

'एएमएनएलको पूर्ण स्वामित्वमा रहेको सहायक कम्पनी विश्वप्रधान कमर्शियल प्राइभेट लिमिटेड (भीसीपीएल) सँग आरआरपीआर होल्डिङ प्राइभेट लिमिटेड (आरआरपीआर)को वारेन्ट छ र यसलाई आरआरपीआरमा ९९.९९ प्रतिशत शेयरमा रूपान्तरण गर्ने अधिकार छ।

'भीसीपीएलले आरआरपीआरमा ९९.५ प्रतिशत सेयर अधिग्रहण गर्न वारेन्ट प्रयोग गरेको छ,' कम्पनीको विज्ञप्तिमा भनिएको छ। एएमजी मिडिया नेटवर्क्स लिमिटेडका सीईओ सञ्जय पुगलियाले पनि एक विज्ञप्तिमा  'यो अधिग्रहण एएमएनएलको प्लेटफर्महरूमा नयाँ युगको मिडियाको मार्ग प्रशस्त गर्ने लक्ष्यको यात्रामा महत्त्वपूर्ण कोसेढुङ्गा' रहने बताएका छन् ।

उनले अघि भनेका छन्,'एएमएनएलले भारतीय नागरिक, उपभोक्ता र भारतमा रुची राख्नेहरूलाई सूचना र ज्ञानका साथ सशक्त बनाउन खोज्छ। समाचारहरूमा यसको अग्रणी स्थिति र विधा र भौगोलिक क्षेत्रहरूमा यसको बलियो र विविध पहुँचको साथ एनडीटीभी हाम्रो दृष्टिमा डेलिभर गर्न सबैभन्दा उपयुक्त प्रसारण र डिजिटल प्लेटफर्म हो। हामी समाचार वितरणमा एनडीटीभीको नेतृत्वलाई बलियो बनाउन तत्पर छौं।'

टिभि च्यानलहरू र वेबसाइटहरू सञ्चालन गर्ने एनडीटीभीले आफ्नो सहमति बिना यो कदम चालेको बताएको छ। अदानीले कुनै पनि 'चर्चा, सहमति वा सूचना बिना कम्पनीको २९ प्रतिशत सेयर अधिग्रहण गरेको छ,' एनडीटीभीका संस्थापक र प्रवर्द्धकहरूले एक विज्ञप्तिमा भनेका छन्।

एनडीटीभीले सन् २०२२ मा ८५ करोडको खुद नाफा कमाएको थियो ।