विद्यालयमा आत्मघाती आक्रमण, कम्तीमा १९ जनाको मृत्यु
हाम्रा कुरा
प्रकाशित २०७९ असोज १४ शुक्रबार
1.9k
Shares
काठमाडौं । अफगानिस्तानको राजधानीमा रहेको एउटा शैक्षिक संस्थानमा आत्मघाती बम आक्रमणकारीले आक्रमण गर्दा कम्तीमा १९ जनाको मृत्यु भएको छ ।
सिया मुस्लिम बाहुल्य अल्पसंख्यक हजारा समुदायको घर रहेको पश्चिमी काबुलको दश्त ए बर्ची इलाकामा शुक्रबार बिहान भएको विस्फोटमा अन्य २७ जना घाइते भएका प्रहरी प्रवक्ता खालिद जाद्रानले बताएका छन् ।
'विद्यार्थीहरू परीक्षाको तयारी गरिरहेका बेला यस शैक्षिक केन्द्रमा आत्मघाती बम हमला भयो। दुर्भाग्यवश १९ जनाको मृत्यु भएको छ भने २७ जना घाइते भएका छन्,' उनले भनेका छन्।
विभिन्न सामाजिक सञ्जालहरुमा पोस्ट गरिएका भिडियोहरू र स्थानीय सञ्चारमाध्यमहरूले प्रकाशित गरेका तस्बिरहरूमा रगतले लतपतिएका पीडितहरूलाई घटनास्थलबाट लगिएको देखाइएको छ।
मारिनेहरूमा हाईस्कूलका केटी र केटाहरू दुवै रहेका छन् । घटना हुँदा विद्यार्थीहरुले काज शिक्षा केन्द्रमा विश्वविद्यालयको इन्ट्रान्स परीक्षा दिइरहेको उनले बताएका छन्। अफगानिस्तानमा शुक्रबार विद्यालयहरू सामान्यतया बन्द हुन्छन्।
'नागरिक लक्ष्यमा आक्रमण गर्नुले शत्रुको अमानवीय क्रूरता र नैतिक मापदण्डको कमीलाई प्रमाणित गर्दछ,' उनले आक्रमणको पछाडि कसको हात रहेको भन्ने कुरा पुष्टि नभएको बताउँदै भनेका छन् ।
घाइते हुनेमा अधिकांश बालिका रहेको एक घाइते विद्यार्थीले बताए । 'हामी कक्षाकोठामा करिब ६०० (विद्यार्थी) थियौं, तर मृत्यु हुनेमा अधिकांश केटीहरू छन्,' पुरुष विद्यार्थीले आफ्नो उपचार भइरहेको अस्पतालबाट एएफपी समाचार एजेन्सीलाई भनेका छन्। तत्काल कुनै समूहले घटनाको जिम्मेवारी लिएको छैन।
