कतार विश्वकपः नेदरल्यान्ड्सको विजयी शुरुआत, सेनेगल पराजित

हाम्रा कुरा

प्रकाशित २०७९ मंसिर ६ मंगलबार

काठमाडौं । नेदरल्यान्ड्सले कतारमा जारी फिफा विश्वकप फुटबलमा विजयी शुरुआत गरेको छ ।दोहास्थित अल थुमामा स्टेडियममा सोमबार राति सेनेगललाई २–० ले हराउँदै नेदरल्यान्ड्सले सुखद शुरुआत गरेको हो ।

नेदरल्यान्ड्सलाई जित दिलाउन कोडी गाक्पो र डाभी क्लासेनले एक एक गोल गरे । पहिलो हाफ गोलरहित बराबरीमा सकिएको खेलको दोस्रो हाफमा नेदरल्यान्ड्सले दुवै गोल गरेको थियो ।

खेलको ८४ औं मिनेटमा गाक्पोले फ्रान्की डी जोङको पासमा हेडमार्फत उत्कृष्ट गोल गरे । यो गाक्पोको विश्वकपको डेब्यु खेलमा गरेको गोल हो ।

इन्जुरी समयमा क्लासेनले गोल गर्दै नेदरल्यान्ड्सलाई २–० को जित दिलाए ।

यस जितसँगै नेदरल्यान्ड्सले पहिलो खेलमै ३ अंक जोडेको छ । समूह ए मा रहेको नेदरल्यान्ड्स शीर्ष स्थानमा रहेको छ । समान अंकबाट इक्वेडर दोस्रो स्थानमा रहेको छ । इक्वेडरले आयोजक कतारलाई २–० ले नै हराएको थियो ।

अंकविहीन सेनेगल तेस्रो तथा कतार चौथो स्थानमा रहेको छ ।