जर्मनीलाई हराएर हैसिएको जापान कोष्टारिकासँग पराजित

हाम्रा कुरा

प्रकाशित २०७९ मंसिर ११ आइतबार

काठमडौं । कतारमा जारी विश्वकप फुटबलमा जापानलाई झड्का लागेको छ । पहिलो खेलमा जर्मनीलाई २–१ ले हराएर सनसनी मच्याएको जापानले दोस्रो खेलमा भने कोस्टारिकासँग आत्मसमर्पण गरेको हो ।

जापान आइतबार साँझ सम्पन्न खेलमा कोस्टारिकासँग १–० ले पराजित भयो । यो खेल जितेको भए जापानले एक खेलअघि नै राउन्ड अफ सिक्सटिनमा स्थान बनाउने थियो ।

खेलको ८१ औं मिनेटमा केशेर फुलर स्पेन्सले निर्णायक गोल गरे । खेलमा जापान र कोस्टारिकाका ३–३ खेलाडीले पहेँलो कार्ड पाएका थिए ।

खेलमा पराजित भए पनि नियन्त्रण भने जापानले राखेको थियो । जापानले ५८ प्रतिशत तथा कोस्टारिकाले ४२ प्रतिशत बल नियन्त्रणमा राखेको थियो । जापानले गोलका लागि तीन वटा प्रहार गरे पनि सफल भएन । कोस्टारिकाले एउटै प्रहारबाट गोल सम्भव बनायो ।

पहिलो खेलमा स्पेनसँग ७–० ले पराजित भएको कोस्टारिकालाई राहत भएको छ । यो खेलपछि समूह ई मा स्पेन, जापान र कोस्टारिकाको समान ३–३ अंक भएको छ ।

आज राति १२ः४५ बजे स्पेन र जर्मनी भिड्दै छन् । जितले स्पेन राउन्ड अफ सिक्सटिनमा पुग्नेछ भने हारले जर्मनी बाहिरिनेछ ।