भारत र क्रोएसियाबीच जाग्रेबमा विदेश कार्यालय परामर्श

एजेन्सी,

प्रकाशित २०७९ कार्तिक १९ शनिबार

नयाँ दिल्ली। भारत र क्रोएसियाले शुक्रवार जाग्रेबमा विदेश कार्यालय परामर्शको १० औँ सत्रको आयोजना गरेको छ, जहाँ दुवै पक्षले विद्यमान द्विपक्षीय सम्बन्धको विस्तृत समीक्षा गरेका हुन्।

भारतीय पक्षबाट सचिव (पश्चिम) सञ्जय वर्माले बैठकको सह अध्यक्षता गरेका थिए भने क्रोएसियाली पक्षको नेतृत्व क्रोएसियाको विदेश तथा युरोपेली मामिला मन्त्रालयका राजनीतिक मामिलाका महानिर्देशक डा पेटार मिहाटोभले गरेका थिए।

दुवै पक्षले व्यापार तथा आर्थिक सम्बन्ध, रक्षा तथा सामुद्रिक, विज्ञान तथा प्रविधि, नवप्रवर्तन, अनुसन्धान तथा विकास, उच्च शिक्षा, पर्यटन र संस्कृतिमा सहयोग सुदृढ गर्ने विषयमा पनि विचार आदानप्रदान गरेका थिए।

उनीहरूले जनता–जनताबीचको सम्बन्धलाई सुदृढ बनाउने महत्त्वलाई पनि जोड दिएका छन् र संयुक्त राष्ट्र सङ्घ र अन्य बहुपक्षीय फोरममा सहयोग, जलवायु परिवर्तन र दिगो विकासलगायत पारस्परिक हितका अन्तर्राष्ट्रिय मुद्दाहरूमा छलफल गरेका छन्।

दुवै पक्षले युरोपेली सङ्घ, क्वाड, इन्डो-प्यासिफिक, युक्रेन द्वन्द्व र भारतको छिमेकमा भएका घटनाक्रमका बारेमा विचार आदानप्रदान गरे र अर्को वर्ष नयाँ दिल्लीमा परराष्ट्र कार्यालय परामर्शको अर्को चरण पारस्परिक रूपमा सुविधाजनक मितिमा आयोजना गर्न सहमत भए।