नयाँ दिल्ली। भारतीय विदेश मन्त्री एस जयशंकरले बिहीबार आफ्नो सिरियाली समकक्षी डा फैसल मेकदादलाई भारतबाट जारी मानवीय सहयोग जारी रहने बताएका छन्।

उनले विशेष गरी औषधि र कृत्रिम अङ्गहरूको सन्दर्भमा आश्वासन दिएका हुन्। ‘सिरियाका विदेश मन्त्री डा. फैसल मेकदादसँग द्विपक्षीय सम्बन्ध र क्षेत्रीय अवस्थाका बारेमा विस्तृत छलफल भएको छ। विशेष गरी औषधि र कृत्रिम अङ्गको सन्दर्भमा भारतबाट जारी मानवीय सहयोग जारी रहने बताएका छौँ,' जयशंकरले ट्विट गरेका छन्।

भारतले वर्षौँदेखि द्विपक्षीय र बहुपक्षीय च्यानलहरू मार्फत सिरियालाई मानवीय, प्राविधिक र विकासात्मक सहायता प्रदान गर्दै आएको छ। विदेश मन्त्रालयको प्रेस विज्ञप्ति अनुसार सिरियामा समय-समयमा खाद्यान्न र औषधिको खेप महामारीको समयमा पनि आपूर्ति गरिएको छ।

भारतले सिरियामा पावर प्लान्ट र स्टिल प्लान्ट निर्माण गर्न सिरियालाई २८ करोड अमेरिकी डलर बराबरको ऋणको प्रस्ताव गरेको छ। सिरियामा डिसेम्बर २०२० र हालै अक्टोबर-नोभेम्बर २०२२ मा दुई वटा कृत्रिम खुट्टा फिटमेन्ट शिविर (जयपुर फुट) आयोजना गरिएको छ।

अक्टोबर २०२१ मा दमास्कसमा सूचना प्रविधिको लागि नेक्स्ट-जेन सेन्टर स्थापना गरिएको थियो। सिरियाली विद्यार्थीहरूलाई विभिन्न धाराहरूमा भारतमा अध्ययन गर्न करिब १५०० छात्रवृत्ति प्रदान गरिएको छ, जसमा हालको शैक्षिक वर्षमा २०० छात्रवृत्तिहरू पनि समावेश छन्, विज्ञप्तिमा थपिएको छ।

मेकदाद १७-२१ नोभेम्बर २०२२ सम्म भारतको आधिकारिक भ्रमण गरेका हुन्। विदेश मन्त्रीको रूपमा यो उनको पहिलो भारत भ्रमण हो।

जयशंकरले भ्रमणमा रहेका विदेश मन्त्रीलाई आज द्विपक्षीय वार्ताको आयोजना गरेका थिए । दुवै मन्त्रीहरूले द्विपक्षीय सम्बन्धको वर्तमान अवस्थाको समीक्षा गरे र पारस्परिक हितका क्षेत्रीय र अन्तर्राष्ट्रिय मुद्दाहरूमा छलफल गरेको विदेश मन्त्रालयको विज्ञप्तिले जनाएको छ।

दुई पक्षबिचको छलफलमा सिरियालाई मानवीय र विकासात्मक सहयोग विस्तार गर्ने, सिरियाली युवाहरूको क्षमता अभिवृद्धि र मल, औषधि, सूचना प्रविधि आदि क्षेत्रमा सहकार्य गर्ने विषयमा छलफल भएको थियो।

भ्रमणको क्रममा मेकदादले उपराष्ट्रपति जगदीप धनखरलाई भेटेका थिए, भारतीय उद्योग परिसंघ (सीआईआई) मा भारतीय व्यवसायी समुदायसँग कुराकानी गरे, मनोहर पर्रिकर इन्स्टिच्युट फर डिफेन्स स्टडीज एण्ड एनालाइजेस (एमपी आईडीएसए) को भेलालाई सम्बोधन गरे।