काठमाडौं । नेपाल टी–२० क्रिकेट लिगमा लुम्बिनी अल स्टारले विजयी शुरुआत गरेको छ । टीयू क्रिकेट मैदानमा शनिबार फार वेस्टर्न युनाइटेडलाई ६७ रनले हराउँदै लुम्बिनीले सुखद शुरुआत गरेको हो ।
लुम्बिनीले दिएको १ सय ५३ रनको लक्ष्यसहित जवाफी ब्याटिङ गरेको फार वेस्टर्नले १६ ओभर २ बलमा अलआउट हुँदै ८५ रन मात्र बनाउन सक्यो ।
फार वेस्टर्नका लागि कप्तान हस्मतउल्लाह शाहिदीले सर्वाधिक ३५ रन जोडे । लुम्बिनीका दीपेन्द्र सिंह ऐरीले ३ विकेट लिए । सागर ढकालले २ विकेट लिए ।
त्यसअघि टस जितेर पहिले ब्याटिङ गरेको लुम्बिनीले २० ओभरमा ७ विकेट गुमाएर १ सय ५२ रन बनाएको थियो । लाहिरु मिलान्थाले ५० बलमा ६० रन बनाए । फार वेस्टर्नका लागि उमर अलि र करन केसीले समान ३–३ विकेट लिए ।
पहिलो संस्करणको प्रतियोगितामा ६ टोलीको सहभागीता रहेको छ । विजेताले ५५ लाख तथा उपविजेताले ३० लाख पाउने आयोजक नेपाल क्रिकेट संघ क्यानले जनाएको छ ।
तेस्रो हुनले १० लाख र चौथोले ५ लाख रुपैयाँ पुरसकार पाउने क्यानले जनाएको छ ।
