काठमाडौँ। कम इन्धन र यात्रु बोकेका साना विमान मात्रै राख्न सक्ने क्षमताका कारण चिनियाँ सहयोगमा निर्मित हालै उद्घाटन गरिएको नेपालको नयाँ पोखरा अन्तर्राष्ट्रिय विमानस्थलको व्यावसायिक सफलता शङ्कास्पद बनेको छ।
फलस्वरूप पोखरा अन्तर्राष्ट्रिय विमानस्थल बेइजिङले यस्तै रणनीतिक महत्त्वका साथ बनाएको श्रीलङ्काको हम्बनटोटा एयरपोर्ट जस्तै नेपालको सेतो हात्ती बन्न सक्ने देखिएको छ।
गत जनवरी १५ मा यति एयरलाइन्सको विमान दुर्घटना भएको विमानस्थलमा इन्धन र यात्रुको प्रतिबन्ध र रात्रि अवतरण सुविधा सञ्चालन हुन नसकेकोले ए३२० र बी७३७ जस्ता मध्यम आकारका न्यारो बडीका विमान सञ्चालनमा आउन सकेको छैन।
ईकोनोमिक टाइम्स (ईटी) अनुसार विमानस्थलको सफलताको विषयले नेपालमा प्रश्न खडा गरेको छ। चीनले विमानस्थललाई बीआरआई परियोजनाको सूचीमा राखे पनि नेपाली प्रशासनका केही वर्गले विरोध गरेका छन्।
एक्जिम बैङ्कबाट २१५.९६ मिलियन डलर ऋणमा बनेको विमानस्थलमा चिनियाँ उपस्थितिले बेइजिङलाई भारतविरुद्ध रणनीतिक गहिराइ दिन सक्छ। उत्तर प्रदेशका धेरै स्थानहरू हवाई मार्गबाट पोखराको नजिक छन्।
पोखरा अन्तर्राष्ट्रिय विमानस्थल गोरखपुरबाट सडक मार्गबाट करिब ३०० किलोमिटर भन्दा अलि टाढा छ, जहाँ एक प्रमुख भारतीय वायुसेना बेस छ। यो एयरपोर्ट गोरखपुरबाट व्यावसायिक उडानबाट २० मिनेट भन्दा कम र लडाकु विमानबाट १० मिनेट भन्दा कमको दुरीमा छ।
नयाँदिल्लीदेखि पोखराको सिधा व्यावसायिक उडान एक घण्टाभन्दा छोटो हुनेछ। चिनियाँ जनमुक्ति सेना (पीएलए)को जेट विमान पोखरामा राखियो भने छोटो समयमै भारतको राजधानी पुग्न सक्छ।
नेपालका नागरिक उड्डयन विज्ञहरूले विमानस्थलले धेरै ट्राफिकहरू आकर्षित गर्न नसक्ने र ठूलो घाटा बेहोर्ने बताउँछन्।
चीनको एक्जिम बैङ्कले आयोजनाका लागि नेपाललाई ऋण दिएको झन्डै पूरै रकम विमानस्थल निर्माणको ठेक्का लिएको चीनको सीएएमसी इन्जिनियरिङ कम्पनीको कोषमा गएको छ।
यदि नेपाल ऋण तिर्न असफल भयो भने, बेइजिङले काठमाडौँलाई चीनले विशेष प्रयोगको लागि लामो समयसम्म एयरपोर्ट भाडामा लिन प्रस्ताव गर्न सक्छ। यसरी नै चीनले श्रीलङ्काको हम्बनटोटा बन्दरगाह ९९ वर्षका लागि भाडामा लिएको छ।
चीनले पोखरामा चिनियाँ नागरिकका लागि होटेल, रिसोर्ट र भ्याकेशन होम निर्माण गर्न नेपाललाई दबाब दिइरहेको बताइएको छ।
