क्यानका सात केन्द्रीय सदस्यले मागे अध्यक्षसहित पाँच पदाधिकारीको राजीनामा, छाडे बोर्ड बैठक
हाम्रा कुरा
प्रकाशित २०७९ माघ १७ मंगलबार
493
Shares
पोखरा । नेपाल क्रिकेट संघ क्यानको बोर्ड बैठकमा विवाद भएको छ । पोखरामा जारी बोर्ड बैठकमा सात केन्द्रीय सदस्यहरुले अध्यक्षसहित पाँच जनाको राजीनामा मागेसँगै विवाद भएको हो ।
नेपाली क्रिकेटको दूरावस्था निम्त्याउन पाँच पदाधिकारी जिम्मेवारी रहेको भन्दै सात सदस्यहरुले अध्यक्षलाई ज्ञापनपत्र बुझाउँदै बोर्ड बैठक छाडेका छन् ।
केन्द्रीय सदस्य ऋषिराम गौतमले क्यानको दूरावस्थामा अहिलेका पदाधिकारी जिम्मेवार रहेको भन्दै राजीनामा मागिएको बताए । उनले सात सदस्यहरुले राजीनामा मागेसँगै बोर्ड बैठकबाट बाहिरिएकोसमेत बताए ।
सात केन्द्रीय सदस्यहरुमा गौतमसँगै दाउद अन्सारी, संजयराज सिंह, करण महतारा, अमितवीर पाण्डे, छुम्बी लामा र धर्मराज गिरी रहेका छन् ।
यसअघि पनि उनीहरुले पत्रकार सम्मेलन गरेर नेतृत्वको विरोध गरेका थिए । उनीहरुले नेपाल टी–२० लिगको विषयमा धारणा सार्वजनिक गर्दै यो लिगले गर्दा क्यान बदनाम भएको निष्कर्षसमेत निकालेका थिए ।
लिगमा देखिएको पछिल्लो विवादमा कार्यसम्पादन समितिको कमजोरी भएको भन्दै उनीहरुको राजीनामा माग गरिएको थियो ।
आज १७ बुँदे एजेन्डामा छलफल गर्न बसेको बोर्ड बैठक सात सदस्यले बहिस्कार गरेपछि अलपत्र परेको छ ।
यद्यपि १९ सदस्यीय बोर्डमा नेतृत्वका बहुमत सदस्य रहेकाले निर्णय भने गर्न सक्नेछ ।
गौतमले राजीनामा नै मागेको नेतृत्वले ल्याएका एजेन्डा समेटिएको बोर्ड बैठकमा बस्नु उपयुक्त नहुने भन्दै बाहिरिएको बताएका छन् ।
उनले नेतृत्वले राजीनामा नदिए त्यसको जिम्मेवारी पनि बेहोर्नुपर्ने चेतावनी दिएका छन् ।
तर बोर्ड बैठकका एजेन्डा हेर्दा भने चतुरबहादुर चन्द नेतृत्वको क्यानले अर्लि इलेक्सन गर्ने लक्षण देखाएको छ ।
