काठमाडौं । टी–२० क्रिकेटमा अफगानिस्तानले पाकिस्तानलाई पहिलो पटक हराएको छ । पाकिस्तान विरुद्धको पहिलो टी–२० क्रिकेटमा अफगानिस्तानले ६ विकेटले जितेको हो ।
शारजाहमा शुक्रबार राति भएको खेलमा अफगानिस्तानले पाकिस्तानविरुद्ध कुनै पनि शैलीको खेलमा पहिलो पटक जित निकालेको हो ।
पाकिस्तानले दिएको ९३ रनको झिनो विजयी लक्ष्य अफगानिस्तानले १७ ओभर ५ बलमा ४ विकेट गुमाउँदै पूरा गर्यो ।
मोहम्मद नाबी ३८ बलमा अविजित ३८ रनमा बनाए । नजिबउल्लाह जद्रान २३ बलमा १७ रनमा अविजित रहे ।
त्यसअघि टस जितेर पहिले ब्याटिङ गरेको पाकिस्तानले २० ओभरमा ९ विकेट गुमाउँदै ९२ रनमात्रै बनायो ।
इमाद वासिमले ३२ बलमा सर्वाधिक १८ रन बनाउँदा चार खेलाडीले मात्र दोहोरो स्कोर खडा गर्न सके ।
अफगानिस्तानका फजलहक फारुकी, मुजिब उर रहमान र मोहम्मद नाबीले समान २–२ तथा कप्तान राशिद खान, नविन उल हक र अजमतुल्लाह ओमरजाईले समान १–१ विकेट लिए ।
नाबी प्लेयर अफ द म्याच भए ।
पाकिस्तानले बाबर आजम, मोहम्मद रिजवान, इफ्तिखर अहमद, फखार जमान शाहिन शाह अफ्रिदी, हरिस रौफ लगयात खेलाडीलाई यस सिरिजमा विश्राम दिएको छ । नयाँ खेलाडीलाई मौका दिएको थियो ।
