काठमाडौं । बलिउड अभिनेत्री अमिषा पटेल ठूलो समस्यामा परेकी छिन् । अमिषाविरुद्ध वारेन्ट जारी भएको छ । राँचीको एक अदालतले अमिषाविरुद्ध वारेन्ट जारी गरेको हो । चेक बाउन्स र ठगीसँग सम्बन्धित मुद्दालाई लिएर अभिनेत्रीमाथि वारेन्ट जारी गरिएको भारतीय सञ्चारमाध्यमले जनाएका छन् ।
अदालतले बिहीबार अभिनेत्री र उनका व्यापार साझेदार कृणालविरुद्ध धोखाधडी र चेक बाउन्स मुद्दामा वारेन्ट जारी गरेको छ। अमिषाको १५ अप्रिलमा अर्को मुद्दाको मिति तय भएको छ ।
राँची निवासी अजय कुमारले अमिषा र उनका एक व्यापारिक साझेदारविरुद्ध मुद्दा दायर गरेका थिए। उजुरीका अनुसार अजयले अमिषाको निर्देशनमा फिल्म देसी म्याजिकका लागि अभिनेत्रीको खातामा अढाई करोड भारतीय रुपैयाँ ट्रान्सफर गरेका थिए ।
फिल्म २०१३ मा सुरु हुने भनिएको थियो तर अहिलेसम्म बन्न सकेको छैन । धेरै पटक भनेपछि अजयलाई अमिषाबाट २ चेक दिएकी थिइन् । अमिषाले अजयलाई दिएको अढाई करोडको चेक बाउन्स भएको थियो । त्यसपछि अजय अमिषाविरुद्ध अदालत पुगेर मुद्दा दर्ता गराएका थिए ।
लामो समयदेखि चलचित्र जगतबाट टाढा रहेकी अमिषा आगामी फिल्म गदर २ बाट फर्कँदै छिन् । यसअघि उनीविरुद्ध वारेन्ट जारी भएको हो ।
