काठमाडौं । भारतका प्रधानमन्त्री नरेन्द्र मोदीले पर्यटन क्षेत्रमा भारतको दृष्टिकोण प्राचीन संस्कृत श्लोक ‘अतिथि देवो भवः’ मा आधारित रहेको बताएका छन् ।
यसको अर्थ ‘अतिथि देवता समान हुन्’ भन्ने हो । भिडियो सन्देशमार्फत गोवामा आयोजित जी-२० पर्यटन मन्त्रीहरूको बैठकलाई सम्बोधन गरेका प्रधानमन्त्री मोदीले केही समय निकालेर गोवाको सुन्दरताको अन्वेषण गर्न आग्रह गरे ।
उनले अविश्वसनीय भारतको भावनालाई स्मरण गर्दै भने, “पर्यटन मन्त्रीहरूले विश्वव्यापी रूपमा दुई ट्रिलियन डलरभन्दा बढीको क्षेत्र सम्हालिरहेका भए तापनि उनीहरू आफैं पर्यटक बन्ने मौका विरलै पाउँछन् । जी-२० टुरिजम वर्किङ ग्रुपको समापन तथा अन्तिम बैठकका साथै पर्यटन मन्त्रीस्तरीय बैठक जुन १९ देखि २२ सम्म गोवामा भइरहेको छ ।
प्रधानमन्त्री मोदीले पर्यटन केवल दर्शनीय स्थलमात्र नभएर इमर्सिभ अनुभव पनि भएको बताए । उनले भने, “संगीत होस् वा खाना, कला होस् वा संस्कृति, भारतको विविधता साँच्चिकै भव्य छ ।”
“उच्च हिमालयदेखि घना जङ्गल, सुख्खा मरुभूमिदेखि सुन्दर समुद्र तट, साहसिक खेलदेखि ध्यान केन्द्रसम्म, भारतसँग सबैका लागि केही न केही छ ।” उनले भने ।
प्रधानमन्त्री मोदीले पर्यटनका लागि विश्वस्तरीय पूर्वाधार निर्माण गर्दै पर्यटन क्षेत्रमा भारतको प्रयास आफ्नो समृद्ध सम्पदाको संरक्षणमा केन्द्रित रहेको बताए ।
उनले भने, “यातायात पूर्वाधारदेखि आतिथ्यता क्षेत्र, सीप विकास र हाम्रो भिसा प्रणालीमा समेत हामीले पर्यटन क्षेत्रलाई हाम्रो सुधारको केन्द्रबिन्दुको रूपमा राखेका छौं ।”
जी-२० को अध्यक्षताका क्रममा भारतले देशका विभिन्न १०० स्थानमा करिब २०० वटा बैठक आयोजना गरिरहेको छ ।
प्रधानमन्त्री मोदीले भने, “यदि तपाईंले यी बैठकका लागि भारत भ्रमण गरिसक्नुभएका आफ्ना साथीहरूलाई सोध्नुभयो भने मलाई विश्वास छ कि कुनै पनि दुई अनुभव समान हुनेछैनन् ।”
