एसीसी इमर्जिङ कपमा नेपालले पाकिस्तानलाई दियो १८० रनको लक्ष्य, सोमपाल र प्रतिशले राखे मान

हाम्रा कुरा

प्रकाशित २०८० असार २९ शुक्रबार

काठमाडौँ । श्रीलंकामा जारी एसीसी मेन्स इमर्जिङ टिम्स एसिया कप क्रिकेट प्रतियोगितामा नेपालले पाकिस्तान ए लाई १ सय ८० रनको चुनौती दिएको छ ।

कोलम्बो क्रिकेट क्लबको मैदानमा टस जितेर पहिले ब्याटिङ गरेको नेपालले ३७ ओभरमा अलआउट हुँदै १ सय ७९ रन मात्र बनायो ।

सोमपाल कामीले १०१ बलमा ९ चौका र २ छक्काको सहयोगमा ७५ रन बनाए । नवौँ विकेटका लागि सोमपालले प्रतिश जीसीसँग मिलेर ७० बलमा ५८ रन बनाए । यो साझेदारीले नेपाललाई लज्जास्पद योगफल बन्नबाट जोगाए ।

प्रतिशले २४ बलमा २६ रन बनाए । १५.४ ओभरमा ७२ रन बनाउँदा नेपालले ८ विकेट गुमाएको थियो ।

अर्जुन साउद तथा कुशल मल्लले समान १७, गुलसन झाले १३ तथा आसिफ शेखले १२ रन बनाए बाहेक अन्य ब्याटरले दोहोरो स्कोर जोड्न सकेनन् ।

पाकिस्तान ए का लागि शाहनवाज दहानीले ५ तथा मोहम्मद वासिम जुनियरले ४ विकेट लिए ।

गत मेमा नेपालमा भएको एसीसी प्रिमियर कपको विजेता बन्दै नेपाल इमर्जिङ कपका लागि छानिएको हो । टेस्ट राष्ट्र पाकिस्तान स्वतः छनोट भएको हो ।

नेपालले दोस्रो खेलमा सोमबार भारत ए सँग खेल्नेछ । भारतसँगको खेल डे नाइट खेल हुनेछ । नेपालले समूह चरणको अन्तिम खेलमा बुधबार यूएई ए सँग खेल्नेछ ।

यस प्रतियोगितामा ८ टोलीको सहभागीता रहेको छ । सहभागी टोलीहरुलाई दुई समूहमा विभाजन गरिएको छ । हरेक समूहका शीर्ष दुई टोली सेमिफाइनलका लागि छानिने छन् । अर्को समूहमा श्रीलंका, बंगलादेश, अफगानिस्तान र ओमान रहेका छन् । सेमिफाइनल खेल २१ जुलाईमा हुनेछ ।

सेमिफाइनलका दुई विजेता उपाधिका लागि भिड्ने छन् । फाइनल खेल २३ जुलाईमा हुनेछ ।