काठमाडौँ । नेपाली कांग्रेसका नेता तथा सांसद डा. चन्द्रकान्त भण्डारी डिस्चार्ज भएका छन् । उनको गत बुधबार शल्यक्रिया गरिएको थियो ।
करिब छ महिना अगाडि आगलागीमा परी घाइते भएका उनको कीर्तिपुरस्थित बर्न सेन्टरमा हात र पछाडिको भागको शल्यक्रिया भएको थियो ।
पूर्वनिर्धारित उपचार प्रक्रियाअनुसार नै उनको शल्यक्रिया गरिएको अस्पतालका प्रमुख प्राडा शङ्कर राईले बताएका थिए । उनको शल्यक्रियाका लागि क्यानडाबाट अमेरिकीमूलका चिकित्सक डा तिमोथी स्प्रौलसमेत आएका थिए ।
नेता भण्डारीले आफ्नो उपचारका लागि राज्यले दिएको रकम पनि फिर्ता गर्ने घोषणा गरेकाले डा स्प्रौल आफ्नै खर्चमा डा भण्डारीको शल्यक्रिया गर्न आएको जनाइएको छ ।
गत फागुन ३ गते राति आगलागीमा परेका सांसद डा भण्डारीको शुरुमा कीर्तिपुर बर्न सेन्टरमै उपचार गरी थप उपचार फागुन ४ गतेदेखि भारतको मुम्बईमा रहेको नेसनल बर्न सेन्टरमा गराइएको थियो ।
भारतमा ७३ दिन उपचार गराएर फर्किएपछि उनको गत बैशाख १९ गतेदेखि काठमाडौँको पुरानो बानेश्वरमा रहेको फ्रन्टलाइन अस्पतालमा उपचार भइरहेको थियो ।
कीर्तिपुर बर्न अस्पतालका प्रमुख डा राईसँग परामर्श र निगरानीमा नै उनलाई फ्रन्टलाइनमा उपचार गराइएको थियो । अस्पतालमा उनलाई फिजियोथेरापी, ड्रेसिङलगायतका उपचार गराइएको थियो ।
उनको उपचारका लागि अस्पतालले पनि शुल्क नलिने घोषणा गरेको थियो । राज्यले दिएको रकम फिर्ता दिएकाले उनलाई सहयोग गर्न चाहनेहरू झन् बढेको उनका निकटस्थहरूले बताएका छन् ।
