नेपालगञ्ज । नेपालगञ्ज उद्योग वाणिज्य संघको निर्वाचनमा महासचिव पदमा पुनः मतगणना हुने भएको छ । महासचिव पदका उम्मेदवार टंकप्रसाद शर्माले पुनः मतगणनाको माग गर्दै निर्वाचन समितिलाई निवेदन दिएका कारण पुनः मतगणना गर्ने निर्णय गरिएको निर्वाचन आयुक्त टीकाजंग शाहले जानकारी दिएका छन् ।
निर्वाचन आयुक्तको कार्यालयबाट आज एक सूचना जारी गर्दै उनले महासचिवका उम्मेदवार शर्माले मतगणना कार्यमा चित्त नबुझेको भन्दै मतपरिणाम घोषणा हुनु पूर्व नै निवेदन दिएकाले मंगलबार बिहान ८ बजेदेखि पुनः मतगणना गर्ने जानकारी दिएका हुन् ।
महासचिवका अर्का उम्मेदवार भिमबहादुर रानाभाटलाई नेपालगञ्जज रंगशालाको कभर्डहलमा हुने पुनः मतगणनामा आफैँ वा प्रतिनिधि उपस्थित गराउन भनिएको छ ।
महासचिव पदको सम्पूर्ण मतगणना नगरी जबर्जस्ती ढंगले निर्वाचन आयुक्त शाहले अन्तिम मतपरिणाम घोषणा गरेको भन्दै पुनः मतगणनाको माग गरी निर्वाचन अधिकृतको कार्यालयमा तालाबन्दी गरिएको गरिएको थियो ।
केही मतपत्र गन्न बाँकी छँदै समावेशी प्यानलका भिमबहादुर रानाभाटलाई विजयी भएको घोषणा गरिएको भन्दै पुनः मतगणनाको माग गरिएको थियो ।
साझा प्रजातान्त्रिक समूहबबाट महासचिवमा शर्माले प्रतिष्पर्धा गरेका थिए । निर्वाचन समितिले रानाभाटलाई ६ मतले विजयी भएको घोषणा गरेको थियो ।
