काठमाडौँ । यसै त बर्खायाम त्यसमाथि ठेकेदारले बाटो अलपत्र पारिदिएपछि बूढानीलकण्ठ नगरपालिका वडा नम्बर ६ का स्थानीयवासीलाई चिन्ताले पिरोलेको छ ।
लुँडे खोला करिडोरमा करिब ५० मिटरको बाटोमा गोर्खाली पुलसँगै दुईतर्फ ढुङ्गाको पर्खाल लगाउन ठेकेदारले मनमौजी गरेपछि स्थानीय बाटो बन्द हुँदा पीडा खेप्न बाध्य भएका छन् ।
एक स्थानीयका अनुसार बाटो ठेकेदारले बन्द गरेको तीन महिना भयो । तर यस नगरपालिकादेखि वडालेसमेत वास्ता नगरेको स्थानीयको गुनासो छ । ठेकेदारले सिमेन्ट, फर्मा र डोजर बाटोमै छेकेर राखेको छ ।
यतिसम्म कि अत्यावश्यक पर्यो भने एम्बुलेन्ससमेत कहाँबाट जाने भनेर आपत छ । विद्यालय जानसमेत बालबालिकाले जोखिम मोलेर हिँड्नु पर्ने अवस्था छ । जसका कारण सम्पूर्ण पासिकोट क्षेत्रको आवागमन प्रभावित भएको छ ।
अर्का एक स्थानीय भन्छन्, ‘ठेकेदार को हो र कहाँ छ हामीले देखेका छैनौँ । वडा र नगरपालिकाको मिलिभगत नै त हैन भन्ने आशंका हामीलाई बढाएको छ ।’ उनले भने, ‘मात्र एकघण्टा डोजर चलाइदिने हो भने बाटो बन्ने थियो । तर पासिकोटवासीलाई दुःख दिने नियत देखियो ।’
ठेकेदारका सम्बन्धमा जानकारी लिन खोज्दा नगरपालिकाका सूचना अधिकारी केदारकुमार खड्काले पनि फोन उठाएनन् ।
वडाध्यक्ष रवि खड्काले फोन उठाएनन् । वडासदस्य राजु भण्डारीसँग भने सम्पर्क भयो । उनले आफूलाई यसबारेमा धेरै जानकारी नभएको र स्थानीयको कुनै गुनासोसमेत आफूले नसुनेको बताए ।
सो बाटोको निर्माण सम्बन्धमा भने त्यो प्रदेशको बजेट भएको उनले उल्लेख गरे । पुरानो ठेकेदारले काम सकाएर नयाँ आएकाले आफूलाई त्यसबारेमा जानकारी नभएको उनले बताए ।
यद्यपि उनले स्थानीयबाट कुनै गुनासो आउनासाथ आफू नै फिल्डमा गएर उनीहरुको समस्याको समाधान गर्न लागिपर्ने बताए ।
