मोरक्को । अर्थमन्त्री डा प्रकाशशरण महतले नेपाललाई ऋण सहायता सहुलियतपूर्ण बनाउनु पर्नेमा जोड दिएका छन् । 

विश्व बैंक र अन्तर्राष्ट्रिय मुद्राकोष (आईएमएफ) को संयुक्त वार्षिक बैठकमा विश्व बैक समूह र अन्तर्राष्ट्रिय मुद्रा कोषका कार्यकारी निर्देशकहरु क्रमशः विम्पी सपुत्रा र याती कुर्निआतीले गरेका प्रस्तुतिहरुमा प्रतिक्रिया दिँदै अर्थमन्त्री महतले ऋण सहायता सहुलियतपूर्ण बनाउनु पर्नेमा जोड गरेका हुन् ।  

नेपालका अर्थमन्त्री तथा विश्व बैंक समूहका गभर्नर महतले हाल बसोबास गरिरहेको धर्तीलाई बस्नयोग्य बनाउनु पर्ने विश्व बैंकको थिमलाई समर्थन जनाउँदै जलवायु परिवर्तनको गैर अनुपातिक असर परेको नेपालजस्ता साना अर्थतन्त्र भएका मुलुकका लागि प्रवाह गरिने ऋण सहायता अझ बढी सहुलियतपूर्ण बनाउनु पर्ने र त्यस्ता मुलुकमा क्षमता विकासका कार्यक्रममा लगानी गर्नुपर्ने विचार व्यक्त गरेका हुन् ।

खासगरी विश्व बैंकले तयार गरेको ‘प्लेबुक’ मा सहुलियत दर बढाँउदै जाने कुराको प्रतिबद्धता ठोस रुपमा प्रतिबिम्वित हुनुपर्ने कुरा व्यक्त गरेका छन् । अर्थमन्त्री महतले निजी क्षेत्रसँग सम्बन्धित उपकरणहरुसमेत साना अर्थतन्त्र भएका मुलुकको पहुँचमा पुर्याउनु पर्ने जनाएका छन् । 

व्यालेन्सिट अप्टिमाईजेसनमार्फत बैंकको आयको महत्वपूर्ण हिस्सा विश्व बैंकको सहुलियतपूर्ण ऋण लगानी गर्ने संरचनाको रुपमा चिनिने ‘आइडीए’मा समावेश गरेर जान सकेमा कम आय भएका देशमा सहुलियत दर बढाउनु पर्ने चासोको सम्बोधन हुन सक्ने विचार व्यक्त गरेका छन् ।

त्यसैगरी अन्तर्राष्ट्रिय मुद्राकोषको प्रस्तुतिमा प्रतिकृया दिँदै अर्थमन्त्री महतले कोषको वित्तीय सुविधाहरु परम्परागत कोटाको आधारमा वितरण गर्ने विद्यमान अभ्यासका कारण कम प्रतिनिधित्व भएका मलुकको आवश्यकता प्रतिबिम्वित हुन नसकेकोले जारी कोटा पुनरावोलकन प्रकृयामा पुनर्विचार हुनुपर्ने विचार समेत सशक्त रुपमा राखेका छन् ।

अर्थमन्त्री महतले राखेको विचारको सराहना गर्दै कार्यकारी निर्देशकले सहुलियतपूर्ण ऋणको अंश बढाउनेतर्फ काम शुरु भइसकेको र यसलाई यथाशीघ्र सम्पन्न गरिने जवाफ दिएका छन् । 

साथै आजै अर्थमन्त्रीको कोरियाका उपप्रधानमन्त्री तथा युरोपियन युनियनका कमिस्नरसँग छुट्टाछुट्टै द्विपक्षीय भेटघाट हुने कार्यक्रम तय भएको छ ।