काठमाडौँ । राजधानीमा जारी त्रिकोणात्मक टी–२० क्रिकेट श्रृंखलाको दोस्रो खेलमा नेपालले हङकङमाथि शानदार जित हासिल गरेको छ । मूलपानी क्रिकेट मैदानमा नेपाल ६ विकेटले विजयी भयो ।
९५ रनको झिनो चुनोती नेपालले १३.५ ओभरमा ४ विकेटको क्षतिमा पूरा गर्यो । आसिफ शेखले ३४ बलमा ४२ रन बनाए । त्यस्तै कप्तान रोहित पौडेलले २० बलमा अविजित रहँदै २५ रन जोडे । गुलसन झाले ५ बलमा १४ रन बनाए । इहसान खानले ३ विकेट लिए ।
यसअघि नेपालले हङकङलाई ९४ रनमै रोक्न सफल भएको थियो । हङकङले ३ बल खेल्न बाँकी छँदै सबै विकेट गुमाएर ९४ रन बनायो । यासिम मुर्ताजाले ३६ तथा जिसन अलीले १७ रन बनाएबाहेक कसैले पनि दोहोरो स्कोर खडा गर्न सकेनन् ।
नेपालका लागि करण केसी एक्लैले ४ विकेट लिएका छन् । उनले मात्र १५ रन खर्चेका थिए । त्यस्तै सोमपाल कामी र अबिनाश बोहराले २–२ तथा मौसम ढकाल र कुशल मल्लले १–१ विकेट लिए ।
बुधबारदेखि शुरु भएको प्रतियोगिताको उद्घाटनमा नेपालले यूएईलाई ७ विकेटले पराजित गरेर शानदार शुरूआत गरेको थियो ।
टी–२० विश्वकप छनोटको तयारीका लागि नेपाल क्रिकेट संघ क्यानले श्रृंखला आयोजना गरेको हो ।
श्रृंखलामा नेपाल, यूएई र हङकङ खेलिरहेका हुन् ।
तेस्रो खेलमा अब शनिबार फेरि नेपाल र हङकङ मूलपानीकै मैदानमा खेल्नेछन् ।
