काठमाडौँ । नेकपा माओवादी केन्द्रले जारी पार्टी रुपान्तरण अभियानबाट विगतमा भएका अन्तरविरोध समाधान हुँदै गएको निचोड निकाल्दै जनमानसमा परेको भ्रम निवारण गर्ने प्रयास गरेको छ ।
पार्टी मुख्यालय पेरिसडाँडामा आयोजित पत्रकार सम्मेलनमा उपाध्यक्ष एवं प्रवक्ता अग्निप्रसाद सापकोटाले शीर्ष नेताहरुबीचको समीक्षाको निचोड सुनाउँदै पार्टी चलायमान भएको बताएका हुन् ।
मंसिरमा सडकमा उत्रेर आँधिवेहरी ल्याउृने भनेर माओवादीले हल्ला चलाएपछि सत्ताधारी गठबन्धनका साझेदार दलहरु आक्रामक बनेका थिए । सोही विषयमा स्पष्टीकरण दिनका लागि माओवादीले पत्रकार सम्मेलन गर्दैै जनप्रदर्शन नभइ पार्टीले थालेको रुपान्तरणअनुसार अगाडि बढेको स्पष्ट पारेको हो ।
यसअघि गणतन्त्र जोखिममा परेको बहाना बनाउँदै माओवादीले शक्ति प्रदर्शन गर्ने जनाएको थियो ।
जो सत्तामा छ उसैले सडकमा उत्रेर तमाशा गर्न खोजेको भन्दै आलोचना भएको थियो ।
यसअघि कांग्रेसलगायतले माओवादीले गर्न लागेको सो प्रदर्शनको आलोचना गरेपछि महासचिव देवप्रसाद गुरुङले ‘जन प्रदर्शन’ नभएर ‘माओवादी रुपान्तरण अभियान’ अन्तर्गत एक कार्यक्रम मात्रै भएको स्पष्टीकरण दिएका थिए ।
तर प्रवक्ता सापकोटाले भने जनताले पार्टीको कुरा सुनेको बताए । माओवादीले दुई महिनायता पार्टी रुपान्तरण अभियान चलाइरहेको छ ।
सोही अभियानलाई निरन्तरता दिने पनि माओवादीले बताएको छ ।
