नेपाल विश्वकप २०२४ पुग्दाका मूलपानीका साक्षीहरु [फोटोफिचर]

हाम्रा कुरा

प्रकाशित २०८० कार्तिक १७ शुक्रबार

काठमाडौँ । नेपाल दोस्रो पटक विश्वकप टी–२० क्रिकेट प्रतियोगितामा छानिन सफल भएको छ । विश्वकप टी–२० को एसिया छनोट अन्तर्गत प्रतियोगिताको फाइनलमा पुगेसँगै नेपाल दोस्रो पटक विश्वकपमा छानिएको हो ।

नेपालले सेमिफाइनलमा चिरपरिचित प्रतिद्वन्द्वी यूएईलाई ८ विकेटले हराएको हो । मूलपानी क्रिकेट मैदानमा जितका लागि १३५ रनको सामान्य चुनौती नेपालले १७.१ ओभरमा २ विकेट गुमाएर जित हासिल गर्यो ।

नेपालका लागि आसिफ शेखले ५० बलमा अविजित रहँदै ६३ रन बनाए भने कप्तान रोहित पौडेलले २१ बलमा अविजित रहँदै ३५ रन जोडे । गुल्सन झाले २४ बलमा २२ रन तथा कुशल भुर्तेलले ११ रन बनाए ।

यसअघि टस जितेर यूएईले पहिले ब्याटिङ गर्दै ९ विकेटको क्षतिमा १३४ रन बनायो । भृत्तिय अरविन्दले सर्वाधिक ६४ रन बनाए । त्यस्तै कप्तान मुहम्मद वासिमले २६ तथा अलिशान शराफूले १६ रन जोडे ।

नेपालका लागि कुशल मल्लले ११ रन खर्चेर ३ विकेट लिए । त्यस्तै सन्दीप लामिछानेले २ तथा सोमपाल कामी र कप्तान रोहित पौडेलले १–१ विकेट लिए ।

उत्कृष्ट फिल्डिङ गरेको नेपालले दुई खेलाडीलाई रनआउट गरेको थियो । नेपाल समूहको उपविजेता हुँदै सेमिफाइनलमा अर्को समूहको विजेता यूएईलाई प्रतिद्वन्द्वी पाएको थियो ।

यो खेलका १२ औँ खेलाडी अथवा दर्शकले नेपाललाई विश्वकपमा पुगेको देखे ।

नेपाल क्रिकेट संघ क्यानले दर्शकका लागि स्थान नभएको भन्दै ३५ सय टिकटमात्र बेचेको थियो । अन्य दर्शकलाई घरमै बसेर टेलिभिजन हेर्न भनेको थियो ।

तर हजारौँ दर्शक पुगे मूलपानी र नेपाल विश्वकप पुग्दाका साक्षी बने ।