-
-
-
-
काठमाडौँ । जाजरकोटमा गत शुक्रबार राति गएको ६.४ रेक्टर स्केलको भूकम्पपछि निरन्तर पराकम्पन आइरहेको छ ।
सो क्रममा सोमबार अपरान्ह दुई ठूला पराकम्पन आएका छन् । पहिलो पराकम्पन ४ः३१ बजे रामिडाँडा आसपास केन्द्रविन्दु भएर ५.८ रेक्टर स्केलको आएको छ ।
यो अहिलेसम्मकै ठूलो पराकम्पन हो । त्यस्तै ४ः४० बजे पइन्ट भन्ने ठाउँमा केन्द्रविन्दु भएर ४.५ रेक्टर स्केलको पराकम्पन आएको राष्ट्रिय भूकम्प मापन तथा अनुसन्धान केन्द्रका भूकम्पविद् भरत कोइरालाले जानकारी दिए ।
उनका अनुसार अहिलेसम्म साना ठूला गरी ३९७ ओटा पराकम्पन आइसकेका छन् । त्यस्तै ४ रेक्टर स्केलदेखिमाथिका ९ वटा पराकम्पन आइसकेका छन् ।
आजको ठूलो पराकम्पनले चर्किएका घरहरुलाई थप असर गरेको छ ।
पराकम्पन आउने क्रम नरोकिँदा स्थानीय अझै त्रासमा छन् । भूकम्पविद्हरुले यो भूकम्प मझौला खालको भएकाले अझै ठूलो आउन सक्ने भन्दै सचेत गराइरहेका छन् ।
भूकम्पका कारण जाजरकोट र रुकुम पश्चिममा ठूलो जनधनको क्षति पुगेको छ ।
